Nirmala Sitharaman : बजेट ऐतिहासिक, लूक क्लासिक! अर्थसंकल्पाआधीच निर्मला सीतारमण यांच्या साडीची चर्चा, VIDEO

निर्मला सीतारामन यांचा पेहराव नेहमीच भारतीय विणकाम परंपरेला दाद देणारा असतो. त्यांची प्रत्येक बजेटदरम्यानची साडी खूप खास होती. यंदाही त्यांनी लोकल ते वोकलसाठी संदेश देणारी साडी नेसली आहे. आज त्यांनी तामिळनाडूच्या विणकाम वारशाचा अभिमान सांगणारी हातमागावरील कांजीवरम साडी नेसली. या साडीवर 'कट्टम' म्हणजेच चौकटींची (Checks) वैशिष्ट्यपूर्ण नक्षी होती. जांभळ्या रंगासोबतच त्याला असलेली सोनेरी झरी बॉर्डर आहे. त्यामुळे त्यांच्या व्यक्तिमत्त्वाला एक वेगळीच उंची देते.

कांजीवरम साड्या त्यांच्या शुद्ध रेशीम आणि सोन्या-चांदीच्या जरकामासाठी जगप्रसिद्ध आहेत. फॅशन तज्ज्ञांच्या मते, अर्थमंत्र्यांनी परिधान केलेली ही साडी हातमागावरील प्रकारातील असून, तिची गुणवत्ता आणि त्यावरील पारंपारिक जरकाम पाहता तिची किंमत साधारणतः ३५,००० ते ७०,००० रुपयांच्या दरम्यान असू शकते. यामध्ये जेवढ्या व्हरायटी किंवा सिल्क किंवा बुट्टी डिझाइन वाढत जाते तेव्हा त्या साडीची किंमतही तेवढीच वाढत जाते. डिझाइन आणि रंगाच्या दुर्मीळतेनुसार ही किंमत त्यापेक्षाही जास्त असण्याची शक्यता नाकारता येत नाही.

गेल्या काही वर्षांत निर्मला सीतारामन यांनी ओडिसाची संबलपुरी, धारवाडी कसूती आणि आता कांजीवरम अशा विविध प्रांतीय साड्यांमधून भारतीय विणकरांना नेहमीच प्रोत्साहन दिले आहे. आजही संसदेत प्रवेश करताना त्यांच्या हातातील डिजिटल बजेट असलेलं टॅब आणि ही पारंपारिक साडी यांचा मेळ आधुनिकता आणि परंपरा यांचा सुरेख संगम दर्शवत होता.