रत्नागिरी जिल्ह्यांतील 50 हजारहून अधिक लाडक्या बहिणी दोडक्या झाल्या आहेत. जिल्ह्यातील तब्बल 50,476 महिलांची नावे अपात्र ठरवून रद्द करण्यात आली आहेत. यामध्ये अनेक महिला चुकीच्या माहितीच्या आधारे लाभ घेत असल्याचे आढळून आलं. जिल्ह्यात एकूण 1,08,886 महिलांनी नोंदणी केली होती. मात्र त्यातील जवळपास निम्म्या अर्जदारांच्या पात्रतेवर प्रश्नचिन्ह निर्माण झाले.

प्रशासनाने दोन टप्प्यांतून तपासणी करून पात्रतेची खातरजमा केली. पहिल्या टप्प्यात महिला नोकरी, व्यवसाय करत असल्याचे आढळले, तर दुसऱ्या टप्प्यात आणखी 5,421 महिलांची नावे रद्द करण्यात आली. शासनाच्या नियमानुसार, सरकारी नोकरी, व्यवसाय, शिक्षण घेत असलेल्या महिलांना ही योजना लागू होत नाही. तरीही अशा अनेक महिलांनी लाभ घेतल्याचे उघड झाले. यामुळे रत्नागिरी 878, दापोली 812, खेड 808, गुहागर 558, मंडणगड 555, लांजा 498, संगमेश्वर 462 आणि राजापूर 449 तालुक्यांतील हजारो महिलांना योजनेतून वगळण्यात आलं आहे.