आधार कार्ड अपडेट केलं का? नसेल तर UIDAI तुमच्यासाठीच दिलीय महत्त्वाची अपडेट

0-5 वर्षांच्या मुलांचे आधार बायोमेट्रिकशिवाय बनते: या वयोगटात फक्त मुलाचा फोटो, नाव, जन्मतारीख, पत्ता आणि पालकांच्या कागदपत्रांच्या आधारे आधार तयार होते. बायोमेट्रिक्स घेतले जात नाही.शाळा, परीक्षा आणि शिष्यवृत्तीसाठी अपडेटेड आधार आवश्यक: मुलांचे आधार कार्ड आता शाळा प्रवेश, प्रवेश परीक्षा, शिष्यवृत्ती आणि 'डीबीटी' लाभांसारख्या सेवांसाठी एक महत्त्वाचे दस्तऐवज बनले आहे.

यूआयडीएआय एसएमएस अलर्ट पाठवत आहे: ज्या मुलांच्या आधारमध्ये अद्याप बायोमेट्रिक अपडेट झालेला नाही, त्यांच्या नोंदणीकृत मोबाईल क्रमांकावर यूआयडीएआय एसएमएस पाठवून अलर्ट देत आहे. हे बायोमेट्रिक अपडेट तुम्ही तुमच्या जवळच्या कोणत्याही आधार सेवा केंद्रावर किंवा नियुक्त केंद्रावर जाऊन करू शकता. हे झालं लहान मुलांसाठी पण मोठ्या व्यक्तींसाठी देखील असेच नियम लागू करण्यात आले आहेत.

यूआयडीएआयने 10 वर्षांपेक्षा जास्त जुने आधार कार्ड वेळोवेळी अपडेट करण्याचा सल्ला दिला आहे. ज्या लोकांनी 10 वर्षांपासून त्यांचे आधार कार्ड अपडेट केलेले नाही, त्यांना त्यांचे ओळखपत्र आणि पत्त्याचा पुरावा अपलोड करून कागदपत्रे अपडेट करण्यास सांगितले जाते. जर असे केले नाही, तर काही सेवांसाठी आधार कार्ड वापरण्यात अडचणी येऊ शकतात. कोणत्याही आधार कार्डधारकाचा मृत्यू झाल्यास, मृत व्यक्तीच्या आधार क्रमांकाचा गैरवापर टाळण्यासाठी तो निष्क्रिय करण्याची प्रक्रिया केली जाते.

जर एखाद्या व्यक्तीने एकापेक्षा जास्त आधार क्रमांक काढले असतील, तर यूआयडीएआय त्यापैकी एक क्रमांक ठेवून बाकीचे निष्क्रिय करू शकते. जर आधार कार्ड चुकीच्या माहितीच्या आधारे किंवा फसवणूक करून काढले गेले असेल, तर ते रद्द केले जाऊ शकते. 18 वर्षांवरील व्यक्तींचे आधार कार्ड हे कोणत्याही पूर्वनियोजित तारखेला बंद होत नाही. ते फक्त वर नमूद केलेल्या कारणांमुळे निष्क्रिय केले जाऊ शकते. त्यामुळे, तुमचे आधार कार्ड वैध ठेवण्यासाठी, ते वेळोवेळी अपडेट करणे महत्त्वाचे आहे.