Sensex : निवडणूक का इतर कोणती भीती? शेअर बाजाराला कशाची चिंता, एक्सपर्ट्सनी सांगितलं

मुंबई : भारतातलं शेअर मार्केट सध्या अस्थिर झाल्याचं दिसून येत आहे. गेल्या तीन-चार दिवसांपासून भारतीय शेअर बाजारात सुरू असलेली घसरण आणखी वाढली आहे. कारण निफ्टी आणि सेन्सेक्सने महत्त्वपूर्ण पातळी पार केली आहे. निफ्टी 50 इंडेक्स 22,200च्या महत्त्वाच्या पातळीहून खाली घसरला आहे. अशा स्थितीत ही घसरण आणखी वाढू शकते, असा अंदाज मार्केट एक्सपर्ट्सनी व्यक्त केला आहे. आज सकाळी बेंचमार्क निर्देशांक बीएसई सेन्सेक्स आणि एनएसई निफ्टी 50 लाल चिन्हासह उघडले आणि तेव्हापासून त्यात सातत्याने घसरण होत आहे. देशात सध्या सुरू असलेल्या सार्वत्रिक निवडणुकांचा बाजारावर दबाव पाहायला मिळत आहे. बाजारातल्या या सततच्या घसरणीत चांगल्या तिमाही निकालांमुळे ऑटो सेक्टरमध्ये चांगली तेजी पाहायला मिळत आहे. याशिवाय आयटी शेअर्समध्ये वाढ पाहायला मिळत आहे. एफएमसीजी, एनर्जी, मेटल आणि इन्फ्रासह इतर क्षेत्रांमध्ये विक्रीचा दबाव वाढत आहे.