मुंबईकर, ऐन उन्हाळ्यात तुमचं पाणी बंद होऊ शकतं, 31 मार्चपर्यंत हे कराच, महापालिकेकडून डेडलाईन

पालिकेच्या जल अभियंता विभागाकडून थकीत जलदेयकांची वसुली करण्यासाठी विशेष मोहीम राबविण्यात येत आहे. शहरातील जलजोडणीधारकांकडे मोठ्या प्रमाणावर थकबाकी असल्याने त्याची वसुली करण्यासाठी प्रशासनाने विविध उपाययोजना सुरू केल्या आहेत. नागरिकांनी आपले देयक तपासून तातडीने त्याचा भरणा करावा, असे आवाहनही करण्यात आले आहे.

काही नागरिकांना जलदेयकाची प्रत प्राप्त झालेली नसल्यास त्यांनी संबंधित प्रशासकीय विभाग कार्यालयाशी संपर्क साधावा. तसेच पालिकेच्या ‘अॅक्वा’ या संकेतस्थळावरूनही जलदेयकाची माहिती मिळू शकते. नागरिकांना या संकेतस्थळावरून आपले देयक तपासता येते तसेच त्याची प्रत डाउनलोड करण्याची सुविधाही उपलब्ध आहे. याशिवाय संबंधित सहाय्यक अभियंता (जलकामे) यांच्या कार्यालयातूनही देयकाची प्रत मिळू शकते असे प्रशासनाने स्पष्ट केले आहे.

नागरिकांना जलदेयके भरणे अधिक सोयीचे व्हावे यासाठी विविध पर्याय उपलब्ध करून देण्यात आले आहेत. शहरातील विभाग कार्यालयांमध्ये असलेल्या नागरी सुविधा केंद्रांवर जाऊन देयके भरता येतात. याशिवाय पालिकेच्या अधिकृत संकेतस्थळावरूनही ऑनलाइन पद्धतीने जलदेयकाचा भरणा करण्याची सुविधा उपलब्ध आहे.

तसेच, एनईएफटी, ऑनलाइन व्यवहार आणि मोबाईल अॅप यांसारख्या डिजिटल माध्यमांतूनही नागरिकांना जलदेयके भरता येणार आहेत. त्यामुळे सर्व जलजोडणीधारकांनी 31 मार्चपूर्वी प्रलंबित जलदेयकांचा भरणा करून संभाव्य कारवाई टाळावी असे आवाहन पालिका प्रशासनाने केले आहे.