Mhada Lottery 2024 : म्हाडाचं घर विकता किंवा भाड्याने देता येईल का?, तुमच्या सर्व प्रश्नांची उत्तरं, फक्त एका क्लिकवर..

म्हाडाचे घर मिळाल्यास नियमानुसार 5 वर्षे ते घर विकता येत नाही. 5 वर्षांत हे घर विकण्याचा प्रयत्न केल्यास घरांची नोंदणी किंवा घराच्या नावावर नोंदणी होत नाही. यामध्ये हे घर विकण्यासाठी तुम्हाला म्हाडाकडून एनओसी घ्यावी लागेल. घराचा ताबा मिळाल्याच्या तारखेपासून 5 वर्षे पूर्ण झाल्यानंतरच म्हाडाकडून ही एनओसी जारी केली जाते.

आता म्हाडाची घरे 5 वर्षे विकता येत नसतील तर ती भाड्याने देता येतील का? असा प्रश्नदेखील अनेकांना पडला असेल. म्हाडाने 2 वर्षांपासून घरे भाड्याने देण्यासाठी काही नियम आणि अटी घालून दिल्या आहेत. या अटी व शर्तींच्या अधीन राहून म्हाडा रीतसर परवानगी देते. म्हाडाच्या लॉटरीनंतर हे घर लगेच तुम्ही भाड्याने देऊ इच्छित असाल तर तुम्हाला त्यासाठी म्हाडाकडे अर्ज सादर करावा लागेल. त्या अर्जात तुमच्या घराची माहिती देऊन तुम्हाला घर भाड्याने का द्यायचे आहे? त्याची सविस्तर माहिती द्यावी लागेल. काही कारणास्तव तुम्ही त्या ठिकाणी राहू शकणार नाही, असे या अर्जात तुम्हाला म्हाडाला पटवून द्यावे लागेल.

त्यानंतर हे पत्र तुम्हाला एनओसीसाठी म्हाडाकडे जमा करावे लागेल. यानंतर तुम्हाला म्हाडाकडून एनओसी मिळवण्यासाठी 1 वर्षासाठी म्हाडाला 3 हजार ते 5 हजार रुपये भरावे लागतील. तुम्हाला तुमच्या भाडेकरूबद्दल म्हाडाला कळवावे लागेल, त्यानंतर तुम्हाला एनओसी मिळेल.

ही प्रक्रिया 1 वर्षासाठी आहे. 1 वर्षानंतर तुम्हाला ही प्रक्रिया पुन्हा करावी लागेल आणि 1 वर्षाची फी भरावी लागेल. आता जर काहींना दरवर्षी ही प्रक्रिया करणे शक्य नसेल तर तुम्हाला 3 वर्षांसाठी एनओसी मिळू शकते. मात्र, तुम्हाला 3 वर्षांसाठी खूप पैसे द्यावे लागतील. एक वर्षाचा विचार केला तर ईडब्ल्यूएस (EWS) घरांसाठी 2000, एलआयजी (LIG) घरांसाठी 3000, एमआयजी (MIG) घरांसाठी 4000 आणि एचआयजी (HIG) घरांसाठी 5000 रुपये द्यावे लागतील. ही सर्व प्रक्रिया पूर्ण केल्यानंतर तुम्ही तुमचे घर भाड्याने देऊ शकाल.