पालकवर्गासाठी महत्त्वाची बातमी! ‘ग्लोबल- इंटरनॅशनल’ नावांना ब्रेक; राज्य मंडळाच्या शाळांवर शिक्षण संचालनालयाची कारवाई

महाराष्ट्रामध्ये अशा अनेक शाळा आहेत की, ज्यांच्या नावामध्ये, ग्लोबल, इंटरनॅशनल, सीबीएसई आणि इंग्लिश मिडियम अशा नावांचा समावेश असतो. यामुळे अनेक पालकांची दिशाभूल होते. त्यामुळे अलीकडेच, राज्य शिक्षण संचालनालयाने काढलेल्या पत्रकामध्ये स्पष्ट केले आहे की, हे शब्द फक्त परदेशात शाखा असलेल्या किंवा आंतरराष्ट्रीय बोर्डाशी संलग्न असलेल्या शाळांमध्येच वापरले जाऊ शकतात. या शब्दांमुळे संबंधित शाळा आंतरराष्ट्रीय किंवा केंद्रीय मंडळाशी संलग्न असल्याचा चुकीचा गैरसमज पालकांमध्ये निर्माण झाला आहे. त्यातून शैक्षणिक फसवणुकीचा धोका वाढत असल्याचे शिक्षण संचालनालयाच्या निदर्शनास आले आहे. शिवाय राज्य मंडळाच्या शाळांनी ती नावे शाळांच्या नावात वापरणे योग्य नसल्याचे ही संचालनालयाने स्पष्ट केले आहे.

खरंतर, 'सीबीएसई' हा शब्द केवळ केंद्रीय माध्यमिक शिक्षण मंडळाच्या अधिकृत शाळांनाच वापरणे कायदेशीरदृष्ट्या योग्य आहे. बाकीच्या शाळांना वापरणं चुकीचं आहे. तर, 'इंटरनॅशनल' किंवा 'ग्लोबल' हे शब्द फक्त आयसीएसई बोर्ड असलेल्या शाळांनाच वापरण्यासाठी परवानगी असणार आहे. संबंधित शाळेची परदेशात शाखा किंवा आंतरराष्ट्रीय स्तरावरील अधिकृत संलग्नता असणे आवश्यक आहे. त्यांनाच हे शब्द वापरणं कायदेशीरदृष्ट्या योग्य आहे. परंतु, राज्यातील अनेक शाळांकडे अशी कोणतीही पात्रता नसतानाही हे शब्द वापरले जात असल्याचे आढळले. दरम्यान, शिक्षण संचालनालयाने पालक आणि विद्यार्थ्यांची दिशाभूल होईल अशी नावे असल्यास ती तात्काळ बदलण्याबाबत संबंधित शाळा व्यवस्थापनांना सूचित करण्याचा निर्णय घेण्यात आला आहे.

दरम्यान, इतकं करूनही जर शाळांच्या नावांमध्ये असे शब्द आढळल्यास त्यावर कारवाई करण्याचे संकेत देण्यात आले आहे. शिवाय, नव्याने सुरू होणार्‍या शाळांच्या दर्जावाढीसाठी प्रस्ताव सादर करणाऱ्या शाळांच्या नावांची काटेकोरपणे तपासणी करण्याचे निर्देशही देण्यात आले आहे.