Ranichi Baug: राणीच्या बागेतील पेंग्विन कक्ष बंद राहणार, कारण काय? पुन्हा कधी सुरू होणार?

मुंबई महापालिकेकडून (BMC) पेंग्विनसाठी असलेल्या जागेचा विस्तार करण्याचं काम सुरू होणार आहे. सध्या या कक्षाची 1,800 चौरस फूट जागा आहे, ती आता 800 चौरस फूटांनी वाढवली जाणार आहे. हा विस्तार सध्या बांधण्यात येणाऱ्या नवीन मत्स्यालय प्रकल्पाचा भाग आहे.

या कामादरम्यान पेंग्विनना तात्पुरते त्यांच्या क्वारंटाईन विभागात हलवण्यात येणार आहे. हा तोच विभाग आहे जिथे 2016 साली पेंग्विन मुंबईत आले तेव्हा त्यांना ठेवण्यात आले होते. काम पूर्ण होईपर्यंत म्हणजेच सुमारे दोन महिने प्रदर्शन बंद राहील.

हंबोल्ट पेंग्विन पहिल्यांदा 26 जुलै 2016 रोजी दक्षिण कोरियातील सियोल येथून आणण्यात आले होते. त्यावेळी 3 नर आणि 5 मादी पेंग्विन आले होते. त्यांपैकी दोन पेंग्विन नंतर आजारी पडून मृत्यूमुखी पडले. महापालिकेने दिलेल्या माहितीनुसार, गेल्या पाच वर्षांत सुमारे 25 कोटी रुपये पेंग्विनच्या देखभालीसाठी खर्च करण्यात आले आहेत. महापालिकेच्या अधिकाऱ्यांनी सांगितलं की, “राणीबागेत येणाऱ्या पर्यटकांसाठी हंबोल्ट पेंग्विन हे मोठं आकर्षण आहेत. परदेशात ज्यांना पाहण्यासाठी मोठा खर्च येतो, ते मुंबईत अगदी कमी तिकिटात पाहता येतात.”