मुंबई, ठाणे आणि कल्याण-डोंबिवलीत पाणीबाणी; ‘या’ दिवशी पुरवठा बंद राहणार, कारण काय?

मुंबई महानगरपालिकेच्या अखत्यारित येणाऱ्या मुलुंड व भांडुप परिसरात 27 जानेवारी रोजी सकाळी 10 वाजल्यापासून 28 जानेवारी रोजी सकाळी 10 वाजेपर्यंत तब्बल 24 तास पाणीपुरवठा बंद राहणार आहे. मुलुंड पश्चिम व पूर्वेतील अमर नगर, जय शास्त्री नगर, पंचशील नगर, राहुल नगर, वीणा नगर, योगी हिल, मॉडेल टाऊन मार्ग, लाल बहादूर शास्त्री मार्गालगतचा परिसर, तसेच नाहूर गाव आणि भांडुपमधील खिंडीपाडा (लोअर व अप्पर) भागात निर्जळी राहणार आहे. जलवाहिन्यांच्या दुरुस्तीचे काम हाती घेण्यात आल्याने हा निर्णय घेण्यात आला आहे.

ठाणे शहरातील किसन नगर आणि भटवाडी परिसरातील नागरिकांनाही या पाणीबंदीचा फटका बसणार आहे. मुंबई-ठाणे जलवाहिन्यांवरील दुरुस्ती कामांमुळे या भागांमध्ये 27 जानेवारी सकाळी 10 वाजल्यापासून पुढील 24 तास पाणीपुरवठा पूर्णपणे बंद राहील. त्यामुळे घरगुती वापरासह व्यावसायिक आस्थापनांनाही पाण्याचे नियोजन करणे आवश्यक ठरणार आहे.

कल्याण-डोंबिवली महानगरपालिकेच्या हद्दीतील मोहिली, बारावे, नेतीवली आणि टिटवाळा येथील जलशुद्धीकरण केंद्रांमध्ये मंगळवारी, 27 जानेवारी रोजी विद्युत व तांत्रिक देखभाल कामे करण्यात येणार आहेत. त्यामुळे सकाळी 10 ते सायंकाळी 6 या कालावधीत कल्याण, डोंबिवली व टिटवाळा परिसरात काही तासांसाठी पाणीपुरवठा बंद राहणार आहे.