Mumbai : खुशखबर! 47 वर्षांनंतर अखेर मुहूर्त सापडला; मुंबईहून कोकणात जाणाऱ्या प्रवाशांचा मोठा वेळ वाचणार

महाराष्ट्र राज्य रस्ते विकास महामंडळामार्फत उभारण्यात येत असलेल्या रेवस-रेड्डी सागरी महामार्गातील रेवस-करंजा खाडी पुलाच्या कामाला गती मिळाली आहे. मुंबई आणि कोकणाला थेट जोडणाऱ्या या महत्त्वाच्या प्रकल्पाचे सुमारे 22 ते 25 टक्के काम पूर्ण झाले आहे. डिसेंबर 2026 पर्यंत 50 टक्के काम पूर्ण करण्याचे उद्दिष्ट प्रशासनाने ठेवले आहे.

हा प्रकल्प एकूण 10.2 किलोमीटर लांबीचा आहे. त्यापैकी 2.4 किलोमीटरचा मुख्य पूल खाडीच्या मध्यभागी बांधला जात आहे. करंजा बाजूला 4 किलोमीटर आणि रेवस बाजूला 4 किलोमीटर असे जोडरस्ते तयार केले जात आहेत. सध्या समुद्रात 12 ते 13 खांब उभारण्यात आले असून मोठे दगड टाकून पाया मजबूत करण्याचे काम सुरू आहे.

हा पूल पूर्ण झाल्यानंतर जवाहरलाल नेहरू पोर्ट ते अलिबाग हे अंतर 55 किमीवरून सुमारे 30 किमीवर येणार आहे. त्यामुळे प्रवासाचा वेळ वाचणार असून पेण-पनवेलमार्गे जाण्याची गरज उरणार नाही.