Mumbai : मुंबईकरांचा वेळ वाचणार, मोरबे ते कळंबोली प्रवास सुसाट, सरकारचा मास्टर प्लॅन समोर

भारतीय राष्ट्रीय महामार्ग प्राधिकरणाने यासाठी महत्त्वाचा निर्णय घेतला आहे. तलासरी-मोरवे मार्गानंतर मोरबे ते कळंबोली जंक्शनदरम्यान सुमारे 13 किलोमीटर लांबीचा नवीन रस्ता बांधण्यात येणार आहे. या रस्त्याच्या आराखड्याला केंद्र सरकारने मंजुरी दिली आहे.

मंजुरी मिळाल्यामुळे प्रकल्पाला गती मिळाली असून आता लवकरच भूसंपादनाची प्रक्रिया सुरू होणार आहे. ही प्रक्रिया पूर्ण झाल्यानंतर 2027 मध्ये प्रत्यक्ष बांधकाम सुरू करण्याचे नियोजन आहे. काम सुरू झाल्यावर अंदाजे अडीच ते तीन वर्षांत रस्ता पूर्ण करण्याचा उद्देश आहे. त्यामुळे 2030 पर्यंत हा मार्ग वाहतुकीसाठी खुला होऊ शकतो.

नवीन रस्ता सुरू झाल्यानंतर मोरबे ते कळंबोली जंक्शन हा प्रवास फक्त 15 मिनिटांत पूर्ण होणार आहे. त्यामुळे वाहनचालकांचा वेळ वाचेल आणि इंधनाचीही बचत होईल. विशेषतहा जेएनपीएकडे जाणारी मालवाहतूक अधिक जलद आणि सुरळीत होण्यास मदत होईल. या प्रकल्पामुळे मुंबई आणि परिसरातील वाहतूक कोंडी कमी करण्यासही मोठा हातभार लागणार आहे.