Bullet Train : अहमदाबाद-मुंबई बुलेट ट्रेनबाबत सर्वात मोठं अपडेट, महत्त्वाचा टप्पा पूर्ण, कधी होणार सुरू?

मुंबई-अहमदाबाद हायस्पीड रेल्वे अर्थात बुलेट ट्रेन प्रकल्पांतर्गत पालघर जिल्ह्यातील डहाणू परिसरात डोंगरातील बोगद्याचे भुयारीकरण यशस्वीरीत्या पूर्ण झाले आहे. मंगळवारी या बोगद्याचा ब्रेक-थ्रू करण्यात आला. या कार्यक्रमाला केंद्रीय रेल्वेमंत्री अश्विनी वैष्णव आणि पालघरचे खासदार हेमंत सावरा यांनी व्हिडीओ कॉन्फरन्सद्वारे उपस्थिती लावली.

अधिकाऱ्यांनी दिलेल्या माहितीनुसार पालघर जिल्ह्यात बुलेट ट्रेन प्रकल्पासाठी एकूण सात बोगदे बांधले जात असून मंगळवारी पूर्ण झालेला एमटी-6 हा त्यातील दुसरा बोगदा आहे. या बोगद्याची लांबी 456 मीटर असून रुंदी 14.4 मीटर आहे. या बोगद्याचे खोदकाम न्यू ऑस्ट्रियन टनेलिंग पद्धतीने करण्यात आले आहे. या पद्धतीत ड्रिलिंग आणि नियंत्रित स्फोटांचा वापर केला जातो त्यामुळे कठीण आणि गुंतागुंतीच्या भूगर्भीय भागात काम करणे सुलभ होते. अवघ्या 12 महिन्यांत हे काम पूर्ण करण्यात आले आहे.

याशिवाय बोरिवली-विरार पाचवी आणि सहावी मार्गिका, विरार-डहाणू तिसरी आणि चौथी मार्गिका, पालघर रेल्वेस्थानकाचा पुनर्विकास आणि वसई येथे नवीन मेगा टर्मिनल उभारणीची कामेही वेगाने सुरू असल्याची माहिती देण्यात आली.