300 मिटरपर्यंत उडाले मानवी तुकडे, रात्री 11.30 वाजता काय घडलं? 9 फॉरेन्सिक अधिकाऱ्यांचा जीव कसा गेला?

मिळालेल्या माहितीनुसार, हा स्फोट जप्त केलेल्या स्फोटकांमध्ये (अमोनियम नायट्रेट) घडला आहे. जखमींपैकी किमान पाच जणांची प्रकृती गंभीर असल्याचे वृत्त आहे, त्यामुळे मृतांचा आकडा आणखी वाढण्याची शक्यता आहे. नौगाम पोलीस स्टेशनमध्ये झालेला स्फोट इतका भीषण होता की त्यामुळे स्टेशन परिसरात मानवी अंगाच्या अक्षरश: चिंधड्या उडाल्या. मृतांमध्ये बहुतेक लोक पोलीस आणि फॉरेन्सिक सायन्स टीमचे (FSL) अधिकारी होते. हे सर्वजण जप्त केलेल्या स्फोटकांची तपासणी करत होते, याचवेळी हा स्फोट घडला आहे. श्रीनगर प्रशासनाच्या एका नायब तहसीलदारासह दोन अधिकारीही या स्फोटात मृत्युमुखी पडले.

फॉरेन्सिक टीम आणि पोलीस फरीदाबादहून आणलेल्या स्फोटक पदार्थांची तपासणी करत असताना हा स्फोट झाला. अधिकाऱ्यांनी सांगितले की स्फोटामुळे जवळपासच्या इमारतींनाही नुकसान झाले, स्फोटाच्या तीव्रतेने इमारती हादरल्या. जखमींना भारतीय लष्कराच्या हॉस्पिटल आणि शेर-ए-काश्मीर इन्स्टिट्यूट ऑफ मेडिकल सायन्सेस (SKIMS) येथे नेण्यात आले. वरिष्ठ पोलीस अधिकारी नौगाममध्ये पोहोचले आहेत आणि परिसराला वेढा घालण्यात आला आहे. जम्मू आणि काश्मीरमधील नौगाम पोलीस स्टेशन परिसरात झालेल्या स्फोटाच्या ठिकाणी तपास करण्यासाठी सुरक्षा दल, डॉग स्कॉड दाखल झाले आहेत.

विशेष म्हणजे, नौगाम पोलीस स्टेशननेच परिसरातील विविध ठिकाणी दहशतवादी संघटना जैश-ए-मोहम्मदचे पोस्टर्स चिकटवल्याचे प्रकरण उघडकीस आणलं होतं. नौगाम पोलिसांमुळेच दिल्ली स्फोटाशी संबंधित असलेल्या व्हाईट कॉलर दहशतवादी मॉड्यूलचा पर्दाफाश झाला होता. या शोधानंतर, तपास यंत्रणांनी हरियाणातील फरिदाबादमधून अंदाजे २,९०० किलो स्फोटके जप्त केली होती. तसेच अनेक दहशतवादी डॉक्टरांनाही अटक केली.

ऑक्टोबरमध्ये, अटक केलेल्या डॉक्टरांमध्ये आदिल अहमद राथेर नावाचा डॉक्टरही होता. त्याने काश्मीरमध्ये सुरक्षा दलांवर आणि बाहेरील लोकांवर मोठ्या हल्ल्यांचा इशारा देणारे पोस्टर्स लावले होते. त्यानंतर २७ ऑक्टोबर रोजी त्याला सर्वप्रथम अटक झाली होती. त्याच्या अटकेमुळे १० नोव्हेंबर रोजी दिल्लीतील लाल किल्ल्याजवळ झालेल्या स्फोटात सहभागी असलेल्या व्हाईट कॉलर दहशतवादी नेटवर्कचा पर्दाफाश झाला. त्यात १३ लोकांचा मृत्यू झाला.