Chandrayaan 3 News: चंद्रावर असलेल्या विक्रम लँडर, प्रज्ञान रोव्हरबद्दल मोठी बातमी, इस्त्रोला वाटतेय नवी भीती

एवढंच नाही, तर चंद्रावरची धूळ विक्रम लँडर आणि रोव्हर प्रज्ञानच्या पृष्ठभागावरही पोहोचेल. चंद्रावर हवा नसल्यामुळे तिथली धूळ रोव्हर आणि लँडरला चिकटू शकते. चांद्रयान-3 वर धूळ कशी जागा व्यापते याची पुष्टी करण्यासाठी डेटा उपलब्ध आहे. तसंच अपोलो मोहिमेदरम्यान आढळून आलं होतं. तथापि, चांद्रयान-3 च्या आतापर्यंतच्या कामगिरीवर इस्रोचे शास्त्रज्ञ समाधानी आहेत. कारण ज्या उद्देशाने चांद्रयान-3 तयार केलं होतं, ते कार्य त्याने पूर्ण केलं. स्लीप मोडमध्ये जाण्यापूर्वी 14 दिवसांची मोहीम यशस्वीरीत्या पूर्ण केली.

इस्रोचे अध्यक्ष एस. सोमनाथ यांनी दिलेल्या माहितीनुसार, 'चांद्रयान -3चा रोव्हर प्रज्ञान हा चंद्राच्या पृष्ठभागावर सुप्तावस्थेत आहे. तो पुन्हा सक्रिय होण्याची शक्यता नाकारता येत नाही. चांद्रयान-3 मोहिमेचं उद्दिष्ट सॉफ्ट लँडिंग हे होतं. त्यानंतर पुढचे 14 दिवस प्रयोग केले गेले आणि आवश्यक सर्व डेटा गोळा करण्यात आला.'

सोमनाथ यांनी एका कार्यक्रमात सांगितलं होतं, की 'आता ते तिथे शांत झोपलेत... त्यांना नीट झोपू द्या... आपण त्यांना त्रास द्यायला नको. जेव्हा त्यांना स्वतःहून उठायचं असेल तेव्हा ते उठतील... मला आत्ता एवढंच म्हणायचं आहे.'. रोव्हर पुन्हा सक्रिय होईल अशी इस्रोला अजूनही आशा आहे का, असं विचारलं असता ते म्हणाले, की 'आशा बाळगण्यास हरकत नाही.' सोमनाथ यांनी आशेची कारणं सांगतली. ते म्हणाले, ''या मिशनमध्ये लँडर आणि रोव्हरचा समावेश होता. लँडरची रचना मोठी असल्याने त्याची पूर्ण चाचणी होऊ शकली नाही. जेव्हा उणे 200 अंश सेल्सियस तापमानात रोव्हरची चाचणी घेण्यात आली तेव्हा ते कमी तापमानात काम करत असल्याचं आढळून आले. चांद्रयान-3 मोहिमेचं उद्दिष्ट पूर्ण झालं आहे. इस्रो मिशनद्वारे संकलित केलेल्या वैज्ञानिक डेटाचा शोध घेण्याचा प्रयत्न करत आहे.'

गेल्या 23 ऑगस्टला चंद्रावर उतरल्यानंतर लँडर, रोव्हर आणि पेलोड यांनी एकामागून एक प्रयोग केले, जेणेकरून ते पृथ्वीच्या 14 दिवसांत पूर्ण करता येतील. चंद्रावरचा एक दिवस पृथ्वीवरच्या 14 दिवसांच्या बरोबरीचा असतो. पृथ्वीचा एकमेव नैसर्गिक उपग्रह असलेल्या चंद्रावर रात्र होण्यापूर्वी अनुक्रमे 4 आणि 2 सप्टेंबर रोजी लँडर आणि रोव्हर दोन्ही स्लीप मोडमध्ये गेले होते. इस्रोने 22 सप्टेंबर रोजी सांगितलं होतं, की त्यांनी आपल्या चांद्रमोहिमेतल्या चांद्रयान-3च्या लँडर विक्रम आणि रोव्हर प्रज्ञान यांच्याशी संपर्क साधून त्यांची सक्रिय स्थिती जाणून घेण्याचा प्रयत्न केला आहे. परंतु, अद्याप त्यांच्याकडून कोणतेही सिग्नल्स मिळालेले नाहीत.