पाकिस्तान अन् बांगलादेशवर सर्जिकल स्ट्राईक; स्लीपर सेलचा भयंकर कट उधळला, तामिळनाडूत ISIचे हँडलर्स आणि 8 दहशतवाद्यांना बेड्या

PTI वृत्तसंस्थेच्या माहितीनुसार, सहा जणांना तामिळनाडूतून अटक करण्यात आली.

पोलीस तपासानुसार अटकेत असलेले मिजानूर रहमान, मोहम्मद शबात, उमर, मोहम्मद लिटन, मोहम्मद शाहिद आणि मोहम्मद उज्जल हे समाजविघातक कारवायांत सक्रिय होते. सोशल मीडियावर पाकिस्तानस्थित दहशतवादी संघटनांच्या समर्थनार्थ पोस्ट केल्याचा आरोप त्यांच्यावर आहे. ऑनलाइन दहशतवादी समर्थनाशी संबंधित पोस्टच्या तपासातून या गटापर्यंत धागेदोरे मिळाले. स्थानिक पोलिसांच्या मदतीने पथक तिरुप्पूरमध्ये पोहोचले. तेथे हे सहाही जण गारमेंट कारखान्यांत काम करत असल्याचे आढळले, असे दिल्ली पोलिसांच्या स्पेशल सेलने सांगितले.

कारवाईदरम्यान अधिकाऱ्यांनी आठ मोबाईल फोन आणि 16 सिमकार्ड जप्त केले. या माध्यमातून देशातील विविध भागांमध्ये संपर्क जाळे उभारण्याचा प्रयत्न झाला का, याची चौकशी सुरू आहे.

दिल्ली पोलिसांनी दिलेल्या निवेदनानुसार आरोपींनी काही शहरांमध्ये रेकी केल्याचा संशय आहे. दिल्लीमध्ये “Free Kashmir” असे पोस्टर्स लावल्याचाही आरोप करण्यात आला आहे. तपास अद्याप सुरू असून कटाचा नेमका उद्देश आणि संभाव्य लक्ष्यस्थळे निश्चित करण्याचे काम सुरू आहे.

दरम्यान जम्मू-काश्मीरमधील सांबा येथेही एका व्यक्तीला ताब्यात घेण्यात आले आहे. त्याच्या मोबाईलमध्ये पाकिस्तानचा देशकोड (+92) असलेले अनेक संपर्क क्रमांक सापडल्याचे अधिकाऱ्यांनी सांगितले. या संशयिताला पुढील चौकशीसाठी पोलीस पोस्ट राखा येथे सोपविण्यात आले असून संपर्कांचे स्वरूप आणि संभाव्य दुवे तपासले जात आहेत.

या अटकसत्राच्या एक दिवस आधी गुप्तचर संस्थांनी दिल्लीतील धार्मिक आणि पर्यटनस्थळांना लक्ष्य करण्याच्या लष्कर-ए-तैयबा (LeT) च्या संभाव्य कटाबाबत इशारा दिला होता. गुप्त माहितीनुसार जुन्या दिल्लीतील संवेदनशील भाग विशेषतः चांदणी चौक परिसर संभाव्य लक्ष्यांमध्ये असू शकतात. दिल्ली आणि उत्तर प्रदेशातील प्रमुख हिंदू मंदिरांवर समन्वित IED हल्ल्याची शक्यता व्यक्त करण्यात आली आहे.

सध्या तपास यंत्रणा या संपूर्ण कटामागील हेतू, संभाव्य लक्ष्ये आणि आंतरराष्ट्रीय दुवे यांचा छडा लावत आहेत. अधिकृत पुष्टी आणि पुढील तपासानंतरच संपूर्ण चित्र स्पष्ट होणार आहे.