'माझ्या जीवावर जगते...', भर बाजारात पतीचं भयानक कृत्य, पत्नीचा ऑन द स्पॉट मृत्यू

विश्वकर्मा चौहान नावाच्या आरोपीने बुधवारी संध्याकाळी बाजारामध्ये गर्दीच्या वेळी पत्नी ममता चौहान हिची गोळ्या झाडून हत्या केली. सीसीटीव्ही फुटेजमध्ये हे जोडपे एका फोटो स्टुडिओबाहेर वाद घालत असल्याचं दिसून आलं, त्यानंतर विश्वकर्माने पिस्तूल काढून दोन गोळ्या झाडल्या. एक गोळी ममताच्या छातीत लागली आणि दुसरी तिच्या हातात घुसली. गोळीबारानंतर ममता जागीच कोसळली, यानंतर तिला जवळच्या रुग्णालयात नेण्यात आलं, पण डॉक्टरांनी तिला मृत घोषित केलं.

गोळीबारानंतर पोलिसांनी विश्वकर्मा चौहानला अटक केली. त्याच्या ताब्यातून एक बेकायदेशीर पिस्तूल, तीन जिवंत काडतुसे आणि दोन रिकामे गोळे जप्त करण्यात आले, असे अधिकाऱ्यांनी सांगितले. विश्वकर्मा याच्यावर हत्येचा गुन्हा दाखल करण्यात आला आहे. गोरखपूरमध्ये भर बाजारात गर्दीच्या वेळी घडलेल्या गोळीबारामुळे परिसरात एकच खळबळ माजली.

ममता आणि विश्वकर्मा यांचं लग्न 14 वर्षांपूर्वी झालं होतं आणि त्यांच्या घटस्फोटाची प्रक्रिया सुरू होती. ममता ही खासगी कंपनीमध्ये काम करत होती. तसंच घटस्फोटानंतर मुलीच्या पालनपोषणासाठी तिने शेतजमिनीच्या हस्तांतरणाची मागणी केली होती. विश्वकर्मा आणि ममताला 13 वर्षांची मुलगी आहे, जी ममतासोबत भाड्याच्या घरात राहते.