Love Story : सोनिया आणि राजीव गांधी यांच्या लग्नाला कुटुंबीयांचा होता विरोध, या एका गोष्टीसाठी दिला होता नकार!

सोनिया गांधी यांचा आज (9 डिसेंबर) वाढदिवस. त्या 77 वर्षांच्या झाल्या आहेत. त्यांचा जन्म इटलीत झाला, तर इंग्लंडच्या केंब्रिज विद्यापीठात त्यांचं महाविद्यालयीन शिक्षण झालं. 7 जानेवारी 1965 रोजी सोनिया केंब्रिजला गेल्या. अनेक परदेशी तरुण तिथे शिक्षणासाठी येतात. तिथल्या 2 मुख्य भाषिक शाळांपैकी एका शाळेत त्यांनी प्रवेश घेतला. त्या काळी केंब्रिजमध्ये अशी व्यवस्था होती, की तुम्ही परदेशी असाल तर एखाद्या कुटुंबामध्ये तुमच्या राहण्याची व्यवस्था विद्यापीठ करत असे. सोनियांनाही घर देण्यात आलं; मात्र त्यांना तिथलं जेवण आवडत नव्हतं. सुरुवातीला इंग्रजी बोलण्यातही अडचण येत होती. मग त्यांना त्याच कॅम्पसमध्ये एक ग्रीक रेस्टॉरंट सापडलं. तिथे इटालियन खाद्यपदार्थही मिळत होते. त्याचं नाव होतं वर्सिटी. विद्यापीठातल्या तरुणांमध्ये ते खूप लोकप्रिय होतं. त्याच्या किमतीही विद्यार्थ्यांना परवडतील अशा होत्या. राजीव गांधीही अनेकदा मित्रांसह तिथे येत असत.

तिथेच सोनिया यांनी राजीव गांधी यांना पहिल्यांदा पाहिलं. ते अत्यंत विनम्र आणि शांत होते. एके दिवशी सोनिया तिथे दुपारचं जेवण घेत असताना राजीव त्यांचे कॉमन मित्र क्रिस्टियन वॉन स्टीगलीज यांच्यासोबत तिथे आले व तेव्हा त्यांची सोनिया यांच्याशी ओळख झाली.