Video : प्रजासत्ताक दिनी 'तो' एक सेकंदाचा गोंधळ आणि.... UPSC टॉपर IAS टीना डाबीकडून मोठी चूक, नेटकऱ्यांनी धरलं धारेवर

मुंबई : आयुष्यात आपण कितीही यशस्वी झालो, अगदी देशातील सर्वात कठीण मानली जाणारी 'यूपीएससी' परीक्षा टॉपर म्हणून उत्तीर्ण झालो तरी, कधीकधी एक छोटीशी चूक आपल्याला सोशल मीडियाच्या टीकेचा धनी बनवू शकते. शिस्त, नियम आणि प्रोटोकॉल ही प्रशासकीय अधिकाऱ्यांच्या आयुष्यातील अविभाज्य अंगं असतात. विशेषतः 15 ऑगस्ट किंवा 26 जानेवारीसारख्या राष्ट्रीय सणांना जेव्हा एखादा जिल्हाधिकारी ध्वजारोहण करतो, तेव्हा संपूर्ण जिल्ह्याच्या नजरा त्यांच्याकडे असतात. अशाच एका महत्त्वाच्या प्रसंगी, देशातील सर्वात चर्चेत असलेल्या आयएएस अधिकारी आणि बाडमेरच्या जिल्हाधिकारी टीना डाबी (Tina Dabi) यांच्याकडून एक अशी चूक झाली, ज्याचा व्हिडिओ सध्या इंटरनेटवर वणव्यासारखा पसरला आहे.