साहेबांनी दादांसमोर हात जोडले अन् सुनेत्रा पवार हुंदक्यांनी दाटल्या, इमोशनल करणारा Video

गत संपूर्ण सप्ताहात राष्ट्रवादीच्या विलिनीकरणाची जोरदार चर्चा असताना आणि दोन्ही राष्ट्रवादीतल्या नेत्यांमध्ये दावे प्रतिदावे सुरू असताना ज्येष्ठ नेते शरद पवार हे बुधवारी सायंकाळी राज्याच्या उपमुख्यमंत्री सुनेत्रा पवार यांची भेट घेण्याकरिता पोहोचले आहेत. बारामतीमधील सहयोग सोसायटीमधील निवासस्थानी शरद पवार आणि त्यांच्या पत्नी प्रतिभा पवार तसेच राजेंद्र पवार आणि आमदार रोहित पवार हे देखील सुनेत्रा पवार यांच्या भेटीसाठी दाखल झाले आहेत.

सहयोग सोसायटीतील निवासस्थानाच्या समोर अजित पवार यांचा पुष्पहार घातलेला भलामोठा फोटो लावण्यात आला आहे. शरद पवार यांनी पुष्प वाहून दादांना भावपूर्ण आदरांजली अर्पण केली. ज्यावेळी अजित पवार यांचे दर्शन घेण्याकरिता त्यांनी हात जोडले त्यावेळी पवार कुटुंबातले सगळेच भावुक झाले. सुनेत्रा पवार यांच्या डोळ्यातून घळाघळा पाणी वाहू लागले. अजित पवार यांच्या भगिनी देखील हुंदक्यांनी दाटल्या. पवार कुटुंबातल्या जावा देखील भावनिक झाल्या होत्या. पवार कुटुंबातल्या या हळव्या क्षणांनी उपस्थित सगळेच भावुक झाले.

पार्थ पवार यांनी बुधवारी सकाळी शरद पवार यांची गोविंदबागेत जाऊन भेट घेतली. या भेटीत जवळपास तासभर चर्चा झाली. विलिनीकरणासंदर्भात दोन्ही पक्षांत वेगवेगळे दावे सुरू असताना पार्थ पवार आणि शरद पवार यांच्या भेटीला महत्त्व प्राप्त झाले होते. याच भेटीत संध्याकाळी सहयोगला येतो, असा निरोप शरद पवार यांनी दिला. त्यानुसार शरद पवार हे त्यांच्या पत्नी प्रतिभा पवार यांच्यासह सहयोग निवासस्थानी दाखल झाले.

शरद पवार, प्रतिभा पवार, सुनेत्रा पवार, श्रीनिवास पवार, रणजीत पवार, राजेंद्र पवार, रोहित पवार, पार्थ पवार, शर्मिला पवार, सुनंदा पवार तसेच अजित पवार यांच्या भगिनी विजया पाटील रजनी इंदुलकर, नीता पाटील आदी उपस्थित होते.