Mumbai Metro: मेट्रो 11 बाबत मोठी अपडेट, लोकार्पण वर्षासह तिकीट दर झाले निश्चित, वडाळा ते गेटवे किती पैसे लागणार?

याबाबत मिळालेल्या माहितीनुसार, मेट्रो 11 लाईनची सुरुवात वडाळा येथील आणिक डेपोपासून सुरू होणार असून, शेवट गेटवे ऑफ इंडिया येथे होणार आहे. ही मेट्रो लाईन 17.51 किलोमीटर लांबीची असून त्यावर एकूण 14 स्टेशन्स असतील. यापैकी 13 स्टेशन्स भुयारी आणि एक स्टेशन जमिनीवर आहे. या लाईनच्या उभारणीसाठी 23 हजार 487 कोटी रुपयांचा खर्च येणार आहे. तो भागवण्यासाठी तिकीट विक्रीव्यतिरिक्त 'नॉन फेअर बॉक्स' आणि अन्य माध्यमातूनही उत्पन्न मिळवण्याचा प्रयत्न मुंबई मेट्रो रेल कॉर्पोरेशन करणार आहे.

मेट्रो 11 लाईनची एकूण लांबी 17.51 किलोमीटर आहे. त्यापैकी 16.83 किलोमीटर मार्ग भूमिगत आहे तर 0.667 किलोमीटर मार्ग जमिनीवर आहे. या मार्गावर ताशी 80 किलोमीटर वेगाने सहा डब्यांची मेट्रो धावेल. आणिक बस डेपो, वडाळा डेपो, सीजीएस कॉलनी, गणेशनगर, बीपीटी हॉस्पिटल, शिवडी, हाय बंदर, दारूखाना, भायखळा, नागपाडा, भेंडी बाजार, सीएसएमटी, हार्मोनियम सर्कल, गेटवे ऑफ इंडिया या भागातून मेट्रो धावणार आहे. मुंबई मेट्रो रेल कॉर्पोरेशनच्या अंदाजानुसार, 2031 मध्ये 5.8 लाख, 2041मध्ये 8.69 लाख, 2051 मध्ये 9.8 लाख आणि 2055 मध्ये 10.12 लाख प्रवासी मेट्रो 11चा लाभ घेतील.