Vastu Tips: घरात लक्ष्मी प्रवेश करण्यापूर्वी पाहते या 6 गोष्टी; पैशांसोबत सुख-शांती तेव्हाच देते जर...

'जिस घर में तुम रहतीं, सब सद्गुण आता। सब सम्भव हो जाता, मन नहीं घबराता॥' माता लक्ष्मीच्या या आरतीनुसार, ज्या घरात लक्ष्मी येते तिथे सद्गुण येतात, सगळी कामं पूर्ण होतात आणि मनात कसलीही भीती राहत नाही. या भौतिक जगात अन्न आणि धन याशिवाय जीवन शक्य नाही आणि या दोन्ही गोष्टींचं नियंत्रण लक्ष्मीकडे आहे. त्यामुळेच प्रत्येक घरात तिची उपस्थिती असावी अशी इच्छा असते. माता लक्ष्मी घरात प्रवेश करण्यापूर्वी नेमक्या कोणत्या गोष्टी बघते, ते आपण खालील मुद्द्यांवरून समजून घेऊया.

स्वच्छता आणि नीटनेटकेपणा - लक्ष्मीला स्वच्छता खूप आवडते आणि ती अशाच घरात प्रवेश करते जे स्वच्छ असतं. अस्वच्छ आणि पसारा असलेलं घर मातेला आवडत नाही. जर घर लख्ख आणि व्यवस्थित असेल, तर तिथे लक्ष्मीची कृपा कायम राहते असं मानलं जातं.

शांतता आणि प्रेमळ वातावरण - जिथे शांती, प्रेम आणि सकारात्मकता असते, तिथेच लक्ष्मी निवास करते. जर घरातील माणसं एकमेकांशी प्रेमानं वागत असतील आणि घरात भांडण-तंटा नसेल, तर लक्ष्मी तिथे प्रसन्न राहते. याउलट ज्या घरात सतत कटकटी, भांडणं आणि द्वेष असतो, तिथे लक्ष्मी कधीही प्रवेश करत नाही.

पूजा-पाठ आणि भक्ती - नियमित पूजा करणं, दिवा लावणं आणि देवावर श्रद्धा ठेवल्यानं घरात पवित्रता येते. ज्या घरात नेहमी पूजा-अर्चा आणि आध्यात्मिक कार्य होतात, तिथे लक्ष्मीचा वास असतो. जिथे देवधर्म मानला जात नाही किंवा सण-उत्सव साजरे होत नाहीत, तिथे लक्ष्मी कधीही राहत नाही.

तुळस आणि गाईची सेवा - हिंदू मान्यतेनुसार, ज्या घरात श्रद्धेनं तुळशीची आणि गाईची सेवा केली जाते, तिथे लक्ष्मी कायमची वास्तव्यास येते. अशा घरांपासून लक्ष्मी कधीही दूर जात नाही. पण जिथे प्राणी-पक्षी किंवा माणसांचा अनादर केला जातो, तिथे माता लक्ष्मी कधीच येत नाही.

सच्चेपणा आणि नीतिमत्ता - जिथे फसवणूक, बेईमानी किंवा अनैतिक कामं केली जात नाहीत, तिथे लक्ष्मीचा वास असतो. जे घर सत्याच्या आणि शुद्ध विचारांच्या वाटेवर चालतं तिथे लक्ष्मी कायमस्वरूपी निवास करते. मात्र, जिथे भ्रष्टाचार, चोरी, खोटं बोलणं आणि धोका दिला जातो, तिथे लक्ष्मी टिकत नाही.

सुंदर प्रवेशद्वार - घराचं प्रवेशद्वार जर स्वच्छ असेल आणि फुलांच्या माळेनं किंवा तोरणानं सजवलेलं असेल, तर तिथे पाहुण्यांसोबतच दैवी ऊर्जाही आकर्षित होते. अशा घरात सकारात्मक ऊर्जेचा संचार होत राहतो. ज्या घराचं प्रवेशद्वार सुंदर, स्वच्छ आणि आध्यात्मिकदृष्ट्या आकर्षक असतं, अशी घरं लक्ष्मीला खूप आवडतात.