आनंद, हाल, संकटं... 28 नोव्हेंबरनंतर शनि मार्गीचा कोणत्या राशींवर काय परिणाम होणार?

वैदिक ज्योतिष शास्त्रानुसार, कर्मफळदाता शनि 28 नोव्हेंबर 2025 रोजी वक्री स्थिती सोडून मार्गी गतीने प्रवास सुरू करणार आहेत. हा बदल अत्यंत प्रभावशाली मानला जातो, कारण शनिचा थेट गतीतील प्रवास जीवनातील परिणाम अधिक स्पष्ट आणि अनुभवता येण्यासारखे बनवतो. सध्या ज्यांच्या कुंडलीत साडेसाती किंवा ढैय्या सुरू आहे, अशा व्यक्तींना या बदलाचा थेट परिणाम मिळणार आहे. काही राशींना जीवनातील प्रगती, आर्थिक स्थैर्य, नातेसंबंधातील गोडवा आणि करिअरमध्ये उन्नती मिळणार असली, तरी काही राशींसाठी हा कालावधी संयम आणि सावधानता बाळगण्याचा असणार आहे. शनिच्या मार्गी चालीनंतर कोणत्या राशींवर नेमका कसा परिणाम होईल? ते सविस्तर जाणून घेऊयात.

सिंह - सिंह राशीच्या व्यक्तींवर सध्या ढैय्या सुरू आहे. शनिच्या मार्गी गतीमुळे या राशीच्या जीवनात आनंद वाढत असल्याचे संकेत मिळत आहेत. अडथळे कमी होणार असून, पूर्वी थांबलेल्या कामांना गती मिळेल. कौटुंबिक वातावरणात सौहार्द निर्माण होईल आणि मानसिक ताण कमी होईल. मात्र, या काळात अनावश्यक लोकांशी संबंध वाढवणे टाळावे असा विशेष सल्ला दिला जात आहे. संयम आणि शांतता राखल्यास या राशीला अधिक लाभ मिळतील.

मीन - मीन राशीच्या स्वामी ग्रह गुरु असल्यामुळे शनीच्या मार्गी चालीचा या राशीवर मिश्रित परंतु महत्त्वपूर्ण परिणाम दिसून येईल. करिअरच्या क्षेत्रात काही आव्हाने निर्माण होण्याची शक्यता आहे, परंतु त्याचवेळी नातेसंबंध आणि वैयक्तिक आयुष्यात मंगल योग जुळून येतील. नकारात्मक परिस्थिती निर्माण होण्याआधीच त्याचे समाधान मिळण्याची संधी आहे. त्यामुळे या राशीने घाबरण्याची गरज नाही. धैर्य, श्रद्धा आणि आत्मविश्वास कायम ठेवण्याची आवश्यकता आहे.

कुंभ - कुंभ राशीचा स्वामी ग्रह शनि असल्यामुळे हा बदल या राशींसाठी निर्णायक ठरणार आहे. सुरुवातीच्या काही दिवसांत आर्थिक लाभ अपेक्षेप्रमाणे मिळणार नाहीत, परंतु पुढील काळात मोठे सकारात्मक परिणाम अनुभवायला मिळतील. विशेषतः अडकलेले पैसे, थकबाकी किंवा न्यायालयीन प्रकरणांमधील निकाल आपल्या बाजूने येण्याची शक्यता आहे. नोकरी किंवा व्यवसायामध्ये स्थैर्य वाढेल आणि प्रतिष्ठेतील वृद्धी दिसून येईल. धैर्य टिकवा, लाभ निश्चित मिळणार आहे.

मेष - मेष राशीवर मंगळाचा प्रभाव असल्यामुळे शनिच्या मार्गी चालीचा परिणाम या राशीच्या प्रेमसंबंध आणि आर्थिक क्षेत्रावर अधिक दिसून येईल. प्रेमजीवनात गोडवा, आपुलकी आणि जुळवाजुळव वाढणार आहे. विवाहित व्यक्तींसाठीही ही काळ सकारात्मक असणार आहे. आर्थिक दृष्टिकोनातून उत्पन्नाचे नवे मार्ग निर्माण होण्याची शक्यता प्रबळ आहे. मात्र, या काळात संवाद साधताना वाणीवर नियंत्रण ठेवणे अत्यंत आवश्यक आहे. थोडीशी चूक मोठे गैरसमज निर्माण करू शकते.