Ajit Pawar Biopic : अजित पवारांवर बायोपिक? कोण साकारणार प्रमुख भूमिका, दादांनीच सांगितलं होतं या अभिनेत्याचं नाव

राज्याचे उपमुख्यमंत्री अजित पवार यांचं 28 जानेवारी रोजी विमान अपघातात निधन झालं. त्यांच्या निधनानंतर संपूर्ण महाराष्ट्र दु:खात बुडाला आहे. अजित पवार यांच्या मृत्यूनंतर त्यांच्या पत्नी सूनेत्रा पवार यांनी उपमुख्यमंत्री पदाची शपथ घेतली. दरम्यान दादांच्या मृत्यूनंतर त्यांच्या भाषणांचे अनेक व्हिडीओ सोशल मीडियावर होत आहेत. दादांचा स्पष्टवक्तेपणा, त्यांची विनोदबुद्धी, त्यांचे राजकीय विचार हे सगळंच उल्लेखनीय होतं.

आजपर्यंत अनेक राजकीय नेत्यांचं आयुष्य सिनेमाच्या माध्यमातून मोठ्या पडद्यावर उलगडण्यात आलं आहे. अजित पवार यांच्यावरही सिनेमा तयार झाला तर... त्यांच्या सिनेमात त्यांची प्रमुख भूमिका कोण साकारणार? दादांनी स्वत: एका अभिनेत्याचं नाव सांगितलं होतं.

झी चित्र गौरव पुरस्कार 2024 मध्ये अजित दादांनी प्रमुख उपस्थिती लावली होती. यावेळी संगीतकार, गायक अवधूत गुप्तेनं दादांची मुलाखत घेतली होती. तेव्हा त्याने दादांना विचारलं, जर कधी अजित पवार नावाचा बायोपिक झाला तर कोणत्या अभिनेत्याने तुमचा रोल करावा असं तुम्हाला वाटतं?

या प्रश्नाचं उत्तर देत अजित पवार म्हणाले होते, "डॉक्टरांनी ( निलेश साबळे ) करावा असं वाटतं मला." त्यानंतर मोठ्या आनंदानं हसत हसत दादा म्हणाले, "अरे मी ज्या संस्थेचा अध्यक्ष आहे तिथेच डॉक्टरचं शिक्षण झालेलं आहे."

दादा पुढे म्हणाले, "प्रत्येकजण कलाकार असतो. कलाकार जेव्हा त्याची कला पेश करत असतो तेव्हा श्रोत्यांनी तो कलाकार आहे या उद्देशानं तिकडे बघायला पाहिजे. ते त्यांचं काम आहे आपण ते समजून घ्यायला पाहिजे."

दादांचं बोलणं ऐकून डॉ. निलेश साबळे म्हणाला, "खरंतर मी किती चांगलं करतो हे मला माहिती नाही. पण लोकांना आवडायचं. पण मला हे माहिती नव्हतं की, सर बघतात, दादा स्वत: बघतात. पण आता मला कळलंय की ते बघतात त्यामुळे आता जरा जास्त जपून करायला पाहिजे. मी त्यांची जेवढी भाषणं बघितली आहेत तेव्हा मला हे कळलं की, त्यांचा बोलण्याचा एक टोन आहे, त्यांच्या आवाजात एक बेस आहे."

अजित पवार म्हणाले होते, "डॉक्टर काय बोलतात हे मी देखील अनेकवेळा बघत असतो. आम्ही आरशासमोर प्रॅक्टिस करत नाही. एकदा माइक हातात आल्यानंतर आम्हाला जे विचार पटतात त्या पद्धतीने बोलत असतो."

"पण यांनी बऱ्याचदा या ठिकाणी या ठिकाणी... तेव्हापासून मी ठरवलं की हा शब्द कमीत कमी वापरायचा. त्यानंतर तुम्ही बघा, हा शब्द अजित पवारने बराच कमी केला आहे. डॉक्टर तुम्ही अधून मधून माझी नक्कल करत राहा म्हणजे मलाही कळेल की काय योग्य आहे आणि काय अयोग्य मग मलाही दुरुस्ती करता येईल."