Gautami Patil: 'या क्षेत्रात येऊ नका...', लाखोंच्या सुपाऱ्या घेणाऱ्या गौतमी पाटीलचा मुलींना अजब सल्ला, नेमकं काय म्हणाली?

मुंबई: लाखो तरुणांच्या काळजाचा ठोका चुकवणारी आणि सोशल मीडियावर जिच्या नावाची नेहमीच चर्चा असते, ती गौतमी पाटील सध्या एका वेगळ्या कारणाने चर्चेत आहे.

झगमगत्या लाइट्समध्ये, शिट्ट्यांच्या गजरात तालावर नाचणारी गौतमी आता 'रुपेरी वाळूत...' या म्युझिक व्हिडिओतून एका मराठमोळ्या पण मॉडर्न रूपात प्रेक्षकांसमोर आली आहे.

या गाण्याच्या निमित्ताने गौतमीने आपल्या संघर्षाचा प्रवास जगासमोर आणला असून, नवीन येऊ पाहणाऱ्या मुलींना एक मोलाचा पण धक्कादायक इशारा दिला आहे.

नेहमी वादग्रस्त ठरणाऱ्या लावणी पलीकडे जात गौतमीने यावेळी 'सारेगाम म्युझिक'सोबत काम केलं आहे. विशेष म्हणजे, 'इंडियन आयडल' फेम अभिजीत सावंत याने गायलेल्या आणि ज्येष्ठ गायिका आशा भोसले यांच्या मूळ गाण्यावर गौतमी थिरकली आहे.

अवघ्या तीन दिवसांत या गाण्याला १४ लाखांहून अधिक व्ह्यूज मिळाले आहेत. या यशाने भारावलेली गौतमी म्हणते, "कॅमेऱ्यासमोर सुरुवातीला मी घाबरायचे, पण सिद्धार्थ जाधव सरांनी दिलेल्या आत्मविश्वासाने आज मी इथवर पोहोचले आहे."

गौतमी पाटील आणि ट्रोलिंग हे जणू समीकरणच बनलंय. पण आता या ट्रोलर्सना ती जुमानत नाही. ती सांगते, "मी मुख्य प्रवाहातील अभिनेत्री नसल्याने मला जास्त ट्रोल केलं गेलं. सुरुवातीला खूप त्रास व्हायचा, पण आता माझ्या टीमच्या आणि कुटुंबाच्या पाठिंब्यामुळे मी खंबीर झाली आहे. नकारात्मकतेकडे दुर्लक्ष करून आपल्या ध्येयावर लक्ष देणं हीच माझी ताकद आहे."

आज अनेक लहान मुली आणि तरुणी गौतमीला आपला आदर्श मानून या क्षेत्रात येऊ पाहत आहेत. पण गौतमीने त्यांना एक कानमंत्र दिला आहे.

ती म्हणाली, "मी सांगते पोरींनो, फक्त स्टेजवरचं ग्लॅमर बघून या क्षेत्रात उडी घेऊ नका. त्यामागे प्रचंड संघर्ष आहे. नृत्य करायचं असेल, तर व्यावसायिक डान्स क्लासमध्ये जा. एका लहान मुलीने मला विचारलं की मला तुझ्यासारखं नाचायचं आहे, तेव्हा मी तिला सांगितलं, आधी तुझं शिक्षण पूर्ण कर. शिक्षणाशिवाय आणि मेहनतीशिवाय इथे शॉर्टकट नाही."

गौतमीला भविष्यात स्वतःचा एक डान्स क्लास सुरू करायचा आहे. पण हा फक्त व्यावसायिक क्लास नसेल. "मला जे मिळालं नाही, ते मला खेड्यापाड्यातील गुणी मुलांना द्यायचं आहे," असं ती अभिमानाने सांगते.

अमृता खानविलकर आणि सई ताम्हणकर यांची चाहती असलेली गौतमी संधी मिळाली, तर अभिनयातही नशीब आजमावण्यास उत्सुक आहे.