IPL 2026 : बीसीसीआयला 'मिडल इस्ट' युद्धाचं टेन्शन नाही, पण... आयपीएलकरता वेगळंच चॅलेंज!

येत्या एक ते दोन दिवसांमध्ये आयपीएलचं वेळापत्रक जाहीर होण्याची शक्यता आहे. बीसीसीआयचे सचिव देवजित सैकिया यांनी याबद्दलची माहिती दिली आहे. यंदाच्या आयपीएलची घोषणा दोन टप्प्यांमध्ये होणार आहे. पहिल्या 20 दिवसांच्या वेळापत्रकाची घोषणा 12 किंवा 13 मार्चला होईल, असं देवजित सैकिया म्हणाले आहेत. निवडणूक आयोगाने विधानसभा निवडणुकीच्या तारखा जाहीर केल्यानंतर आयपीएल 2026 च्या वेळापत्रकाच्या दुसऱ्या टप्प्याची घोषणा केली जाईल.

या उन्हाळ्यात तामिळनाडू, आसाम, पश्चिम बंगाल आणि केरळ या राज्यांमध्ये निवडणुका होणार आहेत, त्यामुळे आयपीएलच्या 3 ते 4 सामन्यांवर या निवडणुकीच्या तारखांचा परिणाम होण्याची शक्यता आहे.

'काही केंद्रांकडून आम्ही पुष्टीची वाट पाहत आहोत, त्यानंतर आम्ही पहिल्या टप्प्याच्या तारखा जाहीर करू', असं सैकिया म्हणाले आहेत. यंदाच्या आयपीएलमध्ये आरसीबीच्या 2 मॅच रायपूरमध्ये होणार आहेत, त्यामुळे रायपूरमध्ये पहिल्यांदाच आयपीएल सामन्यांचं आयोजन करण्यात येणार आहे.

दरम्यान इराण आणि आखाती देशांमध्ये सुरू असलेल्या युद्धामुळे जगभरात चिंतेचं वातावरण आहे. तसंच आयपीएल खेळण्यासाठी युएईमार्गे येणारे आंतरराष्ट्रीय खेळाडू भारतात कसे येणार? याबाबतही प्रश्नचिन्ह उपस्थित केलं जात आहे, पण बीसीसीआयसाठी युद्ध नाही तर विधानसभा निवडणुका चिंतेचा विषय आहे. निवडणुकीच्या तारखा जाहीर झाल्यानंतर संपूर्ण आयपीएल वेळापत्रक जाहीर केलं जाईल, तसंच आयपीएलचा हंगाम 31 मे नंतर वाढणार नाही, असंही सैकिया यांनी स्पष्ट केलं आहे.