Guess Who : 30 हजार मॅरेज प्रपोजल, एकेकाळी होता लाखो मुलींचा क्रश, पण 400 कोटी रुपयांत मोडलं स्वत:चं लग्न, कोण आहे हा सुपरस्टार?

बॉलिवूडमध्ये अनेक स्टार आले आणि गेले, पण काही नावं अशी असतात की ज्यांचं आयुष्यच एखाद्या फिल्मसारखं वाटतं. हृतिक रोशन (Hrithik Roshan) त्यापैकीच एक आहे. हृतिकला कधी 'ग्रीक गॉड' म्हटलं गेलं तर कधी तो देशातील लाखो मुलींचा क्रश ठरला. तर कधी सर्वात महागड्या घटस्फोटामुळे तो चर्चेत राहिला.

फार कमी लोकांना माहिती आहे की कोट्यवधींच्या चित्रपटांआधी आणि सुपरस्टारडमच्या आधी हृतिकने आपलं करिअर फक्त 100 रुपयांपासून सुरू केलं होतं. तर एक असा काळही आला होता की एका चित्रपटानंतर तो रातोरात इतका मोठा स्टार बनला की त्याला 30 हजारांहून अधिक लग्नाच्या मागण्या आल्या.

हृतिक रोशनचा फिल्मी प्रवास एखाद्या स्टार किडसाठी सहजसोप्या जर्नीसारखा नव्हता. त्याची पहिली कमाई फक्त 100 रुपये होती. ही रक्कम त्याला 1980 रोजी रिलीज झालेल्या 'आशा' या चित्रपटासाठी मिळाली होती, ज्यामध्ये त्याने बालकलाकार म्हणून नृत्य केलं होतं. या चित्रपटाचं दिग्दर्शन त्याचे आजोबा ओम प्रकाश यांनी केलं होतं आणि हृतिकने दिग्गज अभिनेता जितेंद्र यांच्यासोबत स्क्रीन शेअर केली होती. इथूनच त्याच्या करिअरची खऱ्या अर्थाने सुरुवात झाली.

2000 साली प्रदर्शित झालेल्या ‘कहो ना… प्यार है’ या चित्रपटाने हृतिक रोशनचं आयुष्यच बदलून टाकलं. चित्रपट रिलीज होताच हृतिक थेट सुपरस्टार बनला. रिपोर्ट्सनुसार, चित्रपटानंतर आलेल्या व्हॅलेंटाइन डेच्या दिवशी हृतिकला 30 हजारांहून अधिक लग्नाच्या मागण्या मिळाल्या होत्या. त्या काळात एखाद्या नव्या अभिनेत्याला मिळालेली ही लोकप्रियता अभूतपूर्व होती.

‘कहो ना… प्यार है’ केवळ बॉक्स ऑफिसवरच नाही, तर पुरस्कारांच्या बाबतीतही इतिहास घडवणारा ठरला. या चित्रपटाने तब्बल 92 पुरस्कार पटकावले आणि त्यामुळेच त्याची नोंद Guinness Book of World Records मध्ये झाली. आजही हा विक्रम बॉलिवूडमधील मोठ्या यशांपैकी एक मानला जातो.

एकीकडे हृतिक रोशनचं व्यावसायिक करिअर शिखरावर होतं, तर दुसरीकडे त्याच्या वैयक्तिक आयुष्यात त्याला मोठे धक्केही सहन करावे लागले. बॉलिवूडमधील सर्वात महागड्या घटस्फोटांचा उल्लेख झाला आणि हृतिक रोशनचं नाव निघालं नाही, असं होणं कठीण आहे.

मीडिया रिपोर्ट्सनुसार, हृतिकने आपली एक्स पत्नी सुझान खान हिला सुमारे 400 कोटी रुपयांची पोटगी दिली होती. हा विषय बराच काळ चर्चेत राहिला होता.