माधुरीनं बॉलिवूड गाजवलं, 'या' 10 मराठी अभिनेत्री मात्र चंदेरी दुनियेतून गायब; आता कुठे आहेत 'या' सौंदर्यवती?

मराठी सौंदर्याने बॉलिवूडला नेहमीच भुरळ घातली आहे. पण चंदेरी दुनियेत टिकून राहणं प्रत्येकालाच जमतं असं नाही. माधुरी दीक्षितने आपलं स्थान अढळ ठेवलं असलं, तरी अशा काही गुणी मराठी अभिनेत्री आहेत ज्यांनी एकेकाळी हिंदी सिनेसृष्टी गाजवली होती. परंतू आज त्या या चमचमीत जगापासून लांब आहेत. चला त्या अभिनेत्रींची नावं आणि कारकिर्दीबद्दल जाणून घेऊ

पद्मिनी कोल्हापुरे (Padmini Kolhapure)70 आणि 80 च्या दशकात पद्मिनी कोल्हापुरे हे बॉलिवूडमधील सर्वात मोठं नाव होतं. 'सत्यम शिवम सुंदरम' मधील बालकलाकार असो किंवा 'प्रेम रोग', 'विधाता', आणि 'सौतन' मधील नायिका त्यांनी आपल्या अभिनयाने सर्वांना थक्क केलं होतं. ऋषी कपूर यांच्यासोबतची त्यांची जोडी प्रचंड गाजली. मात्र, करिअरच्या शिखरावर असतानाच त्यांनी लग्नाचा निर्णय घेतला आणि अभिनयापासून लांब गेल्या. अधूनमधून त्या चरित्र भूमिकेत दिसतात, पण मुख्य प्रवाहातील त्यांचं स्थान माधुरीसारखं टिकून राहिलं नाही.

शिवांगी कोल्हापुरे ( Shivangi Kolhapure)शिवांगी कोल्हापुरे दिसायला अतिशय सुंदर आणि प्रतिभावान होत्या. 1980 मध्ये आलेल्या 'किस्मत' या चित्रपटात त्या मिथुन चक्रवर्ती आणि शक्ती कपूर यांच्यासोबत झळकल्या होत्या. याच चित्रपटाच्या सेटवर त्यांची भेट शक्ती कपूर यांच्याशी झाली. शक्ती कपूर आणि शिवांगी यांच्या प्रेमाला कोल्हापुरे कुटुंबाचा कडाडून विरोध होता. अखेर वयाच्या अवघ्या 18 व्या वर्षी शिवांगी यांनी शक्ती कपूर यांच्याशी पळून जाऊन लग्न केलं. लग्नानंतर शिवांगी यांनी सिनेसृष्टीला कायमचा रामराम ठोकला.

अश्विनी भावे (Ashwini Bhave)'हिना' चित्रपटातून अश्विनी भावे यांनी संपूर्ण देशाला वेड लावलं होतं. 'सैनिक'मध्ये अक्षय कुमार आणि 'बंधन'मध्ये सलमान खानसोबत झळकणाऱ्या अश्विनी यांनी कमी वेळात मोठी लोकप्रियता मिळवली. मात्र, त्यानंतर त्या अमेरिकेला स्थायिक झाल्या. आजही त्यांचा चाहता वर्ग मोठा आहे, पण बॉलिवूडच्या ग्लॅमरस दुनियेत मात्र त्या दिसत नाहीत.

सोनाली बेंद्रे (Sonali Bendre)90 च्या दशकात 'हम्मा हम्मा' गर्ल म्हणून प्रसिद्ध झालेली सोनाली बेंद्रे ही खऱ्या अर्थाने मराठी सौंदर्याची प्रतिनिधी मानली जाते. 'सरफरोश', 'हम साथ साथ हैं', आणि 'दिलजले' यांसारख्या सुपरहिट सिनेमात तिने काम केलं. तिन्ही खानांसोबत (शाहरुख, सलमान, आमिर) झळकलेली सोनाली ही त्या काळातील आघाडीची अभिनेत्री होती. लग्नानंतर तिने चित्रपटांत काम करणं कमी केलं आणि कॅन्सरसारख्या गंभीर आजारावर मात केल्यानंतर ती आता जज म्हणून रिअ‍ॅलिटी शोमध्ये सक्रिय आहे, पण मोठ्या पडद्यावरील तिचं 'कमबॅक' अजूनही प्रेक्षकांसाठी प्रतिक्षाच आहे.

नम्रता शिरोडकर (Namrata Shirodkar)'वास्तव'मधील साधी मराठी मुलगी असो किंवा 'पुकार'मधील ग्लॅमरस भूमिका नम्रता शिरोडकर हिने आपल्या टॅलेंटने बॉलिवूडमध्ये स्थान निर्माण केलं होतं. मात्र, दाक्षिणात्य सुपरस्टार महेश बाबूशी लग्न केल्यानंतर तिने चंदेरी दुनियेला कायमचा रामराम ठोकला. ती आता एक यशस्वी बिझनेसवुमन आणि 'स्टार वाईफ' म्हणून ओळखली जाते.

वर्षा उसगावकर (Varsha Usgaonkar)मराठी सिनेसृष्टीची ही 'सुंदर राणी' बॉलिवूडमध्येही तेवढीच चमकली होती. 'तिरंगा' आणि 'हफ्ता बंद' सारख्या चित्रपटांत त्यांनी जॅकी श्रॉफ आणि नाना पाटेकर यांच्यासोबत काम केलं. हिंदीत त्यांचं नाव चांगलं गाजत असतानाच त्यांनी पुन्हा मराठी चित्रपट आणि नाटकांकडे वळण्याचा निर्णय घेतला, ज्यामुळे त्या बॉलिवूडच्या रेसमधून बाहेर पडल्या.

सोनाली कुलकर्णी (Sonali Kulkarni)'दिल चाहता है' सारख्या आयकॉनिक सिनेमात सैफ अली खानच्या नायिकेची भूमिका सोनालीने साकारली होती. 'मिशन काश्मीर' मध्येही तिने हृतिक रोशनसोबत काम केलं. आंतरराष्ट्रीय स्तरावर नाव कमावूनही सोनाली आता मुख्य प्रवाहातील हिंदी सिनेमांत फारशी दिसत नाही.

पल्लवी जोशी (Pallavi Joshi)पल्लवी जोशी यांनी 'सौदागर' आणि 'पनाह' सारख्या हिंदी चित्रपटांत काम केलं आहे. त्या एक अत्यंत ताकदवान अभिनेत्री म्हणून ओळखल्या जातात. मात्र, त्यांनी नंतर आपला मोर्चा टेलिव्हिजन आणि प्रॉडक्शनकडे वळवला. अलीकडे त्या 'द काश्मीर फाईल्स' सारख्या चित्रपटांतून दिसल्या, तरीही व्यावसायिक बॉलिवूड सिनेमांपासून त्या लांबच आहेत.

उर्मिला मातोंडकर (Urmila Matondkar)'मासूम' मधील गोड बालकलाकार ते 'रंगीला' मधील ग्लॅमरस अभिनेत्री, उर्मिलाचा प्रवास थक्क करणारा आहे. 'जुदाई', 'सत्या', 'पिंजर' आणि 'भूत' सारख्या चित्रपटांतून तिने सिद्ध केले की ती केवळ ग्लॅमरस नाही, तर एक कसदार अभिनेत्री देखील आहे. राम गोपाल वर्मा यांच्या चित्रपटांची ती एकेकाळी जान होती. मात्र, 2003-2004 नंतर तिने चित्रपटांची निवड कमी केली. राजकारणात प्रवेश आणि लग्नानंतर उर्मिला आता मोठ्या पडद्यावर अभिनेत्री म्हणून क्वचितच दिसते. तिची जागा आजही बॉलिवूडमध्ये रिकामीच आहे, असे म्हटले तर वावगे ठरणार नाही.

स्मिता पाटील (Smita Patil)सावळ्या सौंदर्याची जादू आणि कसदार अभिनय म्हणजे स्मिता पाटील. त्यांनी 'मंथन' ते 'नमक हलाल'पर्यंतचा जो प्रवास केला, तो आजही अभिनेत्रींसाठी एक आदर्श आहे. मात्र, वयाच्या 31 व्या वर्षीच त्यांच्या जाण्याने बॉलिवूडमध्ये मोठी पोकळी निर्माण झाली.