'माझी बायको मरणाच्या दारात होती आणि तो माणूस...', फॅनच्या विचित्र मागणीमुळे संतापलेले सतीश शाह, असं घडलं काय?

मुंबई: आपल्या कॉमेडीच्या जबरदस्त टायमिंगने प्रेक्षकांना हसवणारे आणि 'साराभाई व्हर्सेस साराभाई' मधील 'इंद्रवदन' म्हणून घराघरात पोहोचलेले ज्येष्ठ अभिनेते सतीश शाह यांचे नुकतेच निधन झाले.

'हम आपके हैं कौन' मधील 'डॉक्टर साहेब' असो किंवा पडद्यावरचे कोणतेही पात्र; सतीश शाह यांनी साकारलेल्या भूमिका अजरामर झाल्या आहेत. मात्र, एकदा त्यांच्या विनोदी स्वभावावर त्यांचे वैयक्तिक आयुष्य कसे भारी पडले होते, याचा एक धक्कादायक किस्सा समोर आला आहे.

सतीश शाह यांनी त्यांच्या एका जुन्या मुलाखतीत सांगितले होते की, एकदा एका चाहत्याने त्यांच्यासोबत अशी विचित्र कृती केली होती की, त्यांचा संताप सातव्या गगनाला पोहोचला होता. त्यांना त्या चाहत्याला थप्पड मारण्याची इच्छा झाली होती.

शाह यांनी सांगितले की, त्यांनी आपल्या अभिनयातून लोकांना इतके हसवले आहे की, लोकांना असे वाटते की, त्यांनी नेहमीच हसरे राहावे. लोक त्यांना नेहमीच 'कॉमेडी मूड' मध्ये पाहण्याची अपेक्षा करतात.

हा किस्सा सांगताना सतीश शाह भावूक झाले होते. त्यांनी सांगितले की, "तुम्ही जी भूमिका करता, लोक तुम्हाला तसेच समजू लागतात. मी कॉमेडी करतो, म्हणून लोकांना वाटते की, मी फक्त हसतानाच दिसावे."

हा अनुभव त्यांनी तेव्हा घेतला, जेव्हा त्यांची पत्नी मधु यांची तब्येत खूप बिघडली होती आणि त्या मरणाच्या दारात होत्या. त्यावेळी त्यांच्या लग्नाला अवघे तीनच महिने झाले होते.

सतीश शाह म्हणाले, "माझी बायको ऑपरेशन टेबलवर होती. तिची तब्येत खूप गंभीर होती. तो काळ माझ्यासाठी अत्यंत कठीण आणि चिंतेचा होता. त्याच वेळी एक माणूस माझ्या जवळ आला आणि म्हणाला, 'अहो, तुम्ही इतके सिरीयस का बसला आहात? तुम्ही असे चांगले नाही दिसत. काहीतरी असे बोला, ज्यामुळे आम्हाला हसू येईल!'"

सतीश शाह यांनी सांगितले की, त्यावेळी त्यांना इतका राग आला की, 'मी त्याला पंच मारू की काय, असे वाटले होते!'

सतीश शाह यांनी 'हम साथ साथ हैं', 'मैं हूं ना', 'कल हो ना हो', 'भूतनाथ', 'दिलवाले दुल्हनिया ले जाएंगे', 'हिरो नंबर १' अशा अनेक चित्रपटांत काम केले. 'साराभाई व्हर्सेस साराभाई' या मालिकेत त्यांनी रत्ना पाठक शाह यांच्यासोबत प्रमुख भूमिका साकारली होती.