'मला वाटतं 41 कोटींपेक्षा जास्त आहे', 25 वर्षांचं करिअर, सिद्धार्थ जाधवने पहिल्यांदा केलं संपत्तीवर भाष्य

अभिनेता सिद्धार्थ जाधवने नुकतीच अमोल परचुरेंच्या ‘कॅचअप’ या पॉडकास्टमध्ये हजेरी लावली होती. त्यावेळी त्याला विचारण्यात आले की, कुठेतरी वाचनात आलं होतं की तू 41 कोटींचा मालक आहेस. यावर अभिनेत्याने हसून उत्तर दिले. सिद्धार्थ जाधव म्हणाला, “मी माझ्या पूर्ण करिकीर्डीत 41 कोटी कोट्या केल्या असतील.”

पुढे अभिनेता म्हणाला, “जे काही कमवलंय या 25 वर्षात किंवा इतक्या वर्षात ते 41 कोटींच्या पलीकडचं आहे. आकड्यांमध्ये ती संपत्ती मलाही माहित नाही. पण, कुठेतरी स्थिर झालो आहे."

"जेव्हा मुंबईत आलो होतो तेव्हा पप्पांच्या मित्राच्या भाड्याच्या घरात राहत होतो. शिवडीला झोपडपट्टीत राहत होतो. तेव्हा स्वप्न होतं की आई-वडिलांसाठी घर घ्यायचं. ते 26 वर्षांनी पूर्ण केलं.”

सिद्धार्थ जाधव म्हणाला, “आई-वडिलांसाठी छानसं घर घेऊ शकलो. लालबाग शिवडीच्या परिसरात मोठा झालो. त्या परिसरात घर घ्यायचं. माझं स्वप्न होतं की दादरला घर घ्यायचं. बेसिक गोष्टी ज्या जगण्यासाठी लागतात, त्या घेऊन स्वत:ला सेटल करू शकलो. त्यामुळे मला वाटतं की 41 कोटींपेक्षा जास्त आहे."

"माझ्या आई-वडिलांचा आशीर्वाद आहेच. ती मला 100 कोटींचा मालक असल्याची भावना आहे. माझ्या आई वडिलांच्या हक्काच्या घरात सेट करू शकलो. कारण-झोपडपट्टीतून निघाल्यानंतर जेव्हा मी पहिल्यांदा त्यांना भाड्यात घरात ठेवलं. तेव्हा भाड्याच्या घरावर पप्पांची नेमप्लेट लावली होती".

"तेव्हा मला माहित नव्हतं की भाड्याच्या घरावर भाडेकरूची नेमप्लेट लागत नाही. तेव्हा ते मालक म्हणाले होते, तसं होऊ शकत नाही. आता मी आई-वडिलांची नेमप्लेट लावली आहे. ही माझ्यासाठी मिळकत आहे.”

पुढे तो 41 कोटींचा मालक असल्याच्या माहितीवर तो म्हणाला, “ही चांगली गोष्ट आहे. ही बातमी खोटी आहे की कोटी आहे मला माहित नाही. पण चांगली आहे, मला बरं वाटलं”, असे हसत मिश्किलपणे अभिनेत्याने वक्तव्य केले.

सिद्धार्थ जाधव लवकरच ‘आता थांबायचं नाय’ या चित्रपटातून प्रेक्षकांच्या भेटीला येणार आहे. या चित्रपटात भरत जाधवदेखील प्रमुख भूमिकेत दिसणार आहेत. दरम्यान, अभिनेता सध्या ‘आता होऊ दे धिंगाणा’ या शोचे सूत्रसंचालन करताना दिसत आहे. या माध्यमातून तो प्रेक्षकांना खळखळून हसवतो. त्याच्या उत्साहाचे चाहते तसेच कलाकारांकडून नेहमी कौतुक होताना दिसते.