कोण आहे प्रभू शेळके, ज्याने पहिल्याच दिवशी केला 'बिग बॉस मराठी ६' च्या घरात कल्ला? संपत्ती पाहून डोळे गरगरतील

मुंबई: 'बिग बॉस मराठी ६' चा पडदा उघडला आणि एकामागून एक ग्लॅमरस चेहरे घरात शिरू लागले. पण, या सर्वांमध्ये एका तरुणाने आपल्या साध्या, रांगड्या आणि अस्सल कोल्हापुरी ठसक्याने सर्वांचे लक्ष वेधून घेतले, तो म्हणजे प्रभू शेळके.

केवळ एका डायलॉगमुळे महाराष्ट्राच्या घराघरांत पोहोचलेला हा तरुण आता बिग बॉसच्या शंभर दिवसांच्या शोमध्ये आपलं नशीब आजमावण्यासाठी सज्ज झाला आहे.

प्रभू शेळके हे नाव आज कोणाला माहीत नाही? "मुरगी की कापुरा खायगा..." म्हणत चिकन लेग पीसवर ताव मारणारे त्याचे व्हिडिओ सोशल मीडियावर तुफान व्हायरल झाले आहेत. पण प्रभू केवळ रिल्स बनवणारा मुलगा नाही.

अभिनयाची उपजत आवड असलेल्या प्रभूने रंगभूमी, छोटे-मोठे स्टेज शो आणि सार्वजनिक कार्यक्रमांच्या माध्यमातून आपली ओळख निर्माण केली होती. मात्र, ११ जानेवारी २०२६ रोजी जेव्हा त्याने 'बिग बॉस'च्या मंचावर पाऊल ठेवले, तेव्हा खऱ्या अर्थाने त्याची लोकप्रियता सर्वांसमोर आली आहे.

महाराष्ट्राच्या मातीत जन्मलेला आणि वाढलेला प्रभू हा अस्सल मराठी संस्कृतीचा चाहता आहे. त्याचं शालेय आणि महाविद्यालयीन शिक्षण महाराष्ट्रातच पूर्ण झालं. अभ्यासात डोकं चालवत असतानाच त्याचं मन मात्र नाटक आणि अभिनयात रमत होतं. सुरुवातीला छोट्या मोठ्या भूमिकांमधून त्याने कामाला सुरुवात केली. हळूहळू आपला अनुभव आणि आत्मविश्वास वाढवत तो इथवर पोहोचला आहे.

एक सामान्य कंटेंट क्रिएटर म्हणून सुरुवात करणाऱ्या प्रभू शेळकेची आजची एकूण संपत्ती अंदाजे ५० ते ८० लाख रुपयांच्या घरात आहे. त्याच्या कमाईचे मुख्य स्रोत टीव्ही अपिअरन्स, 'बिग बॉस'सारख्या मोठ्या प्लॅटफॉर्मवरून मिळणारे मानधन, स्टेज शो, इन्स्टाग्रामवरील जाहिराती आणि कोलाबोरेशन्स आहेत.

प्रभूच्या वयाबाबत चाहत्यांमध्ये उत्सुकता आहे, पण त्याने आपलं नेमकं वय अजूनही गुलदस्त्यात ठेवलं आहे. 'बिग बॉस'च्या घरात तो सर्वात तरुण स्पर्धकांपैकी एक मानला जात आहे.