सतत बर्फ खाताय? थांबा! तुम्हाला असू शकतो 'हा' गंभीर आजार, डाॅक्टर काय सांगतात?

बऱ्याचदा लोकांना थेट बर्फ खायला आवडतो. पण हे ऐकायला जरी सामान्य वाटत असलं, तरी यामागचं कारण एक गंभीर आरोग्य समस्या असू शकते. सतत बर्फ खाण्याच्या सवयीला वैद्यकीय भाषेत पिका (Pica) म्हणतात आणि जर ते केवळ बर्फ खाण्यापुरतंच मर्यादित असेल, तर त्याला पॅगोफॅगिया (Pagophagia) म्हणतात. चला तर मग जाणून घेऊया बर्फ खाल्ल्याने काय होतं?

बर्फ खाण्याची ही सवय अनेकदा लोहाच्या कमतरतेमुळे होणाऱ्या ॲनिमियाचे (Iron deficiency anemia) लक्षण असते. लोहाच्या कमतरतेमुळे शरीरात ऑक्सिजनचा प्रवाह कमी होतो, ज्यामुळे थकवा, चक्कर येणे आणि लक्ष केंद्रित करण्यात अडचण येणे यांसारख्या समस्या होऊ शकतात. काही लोकांमध्ये, हे बर्फ खाण्याची तीव्र इच्छा म्हणून दिसून येते.

जर तुम्हाला किंवा इतर कोणाला वारंवार बर्फ चघळण्याची सवय असेल, तर वारंवार थकवा येणे, त्वचा फिकट दिसणे, श्वास घेण्यास त्रास होणे, नखे ठिसूळ होणे, लक्ष केंद्रित करण्यात अडचण येणे अशी लक्षणं दिसून येतात.

रक्त तपासणी करा : विशेषतः हिमोग्लोबिन (haemoglobin) आणि फेरिटिनची (ferritin) पातळी तपासणे महत्त्वाचे आहे. लोहयुक्त पदार्थ खा. हिरव्या पालेभाज्या (जसे पालक, मेथी), डाळिंब, बीट, सफरचंद, गूळ, मनुका, खजूर, लाल मांस, अंडी (जर तुम्ही मांसाहारी असाल तर), व्हिटॅमिन सी चा आहारात समावेश वाढवा: ते लोह शोषण्यास मदत करते.

डॉक्टरांच्या सल्ल्यानुसार लोहाच्या गोळ्या किंवा सिरप घेता येतात. कारणं ओळखणं महत्त्वाचं: काही प्रकरणांमध्ये, पोट किंवा आतड्यांमधील आजार लोहाच्या शोषणावर परिणाम करू शकतात.

जर तुम्हाला वारंवार बर्फ खावासा वाटत असेल, तर त्याला हलक्यात घेऊ नका. हे शरीरातील लोहाच्या कमतरतेचे स्पष्ट लक्षण असू शकते आणि त्यावर वेळेवर उपचार करणे आवश्यक आहे.