Marathwada Rain: मराठवाड्यात 24 तासांत हवापालट, आजचा दिवस पावसाचा, 8 जिल्ह्यांना यलो अलर्ट

मागील काही दिवसांपासून सुरू असलेलं पावसाचं सत्र मराठवाड्यात 15 जून रोजी देखील सुरूच राहणार आहे. मराठवाड्यातील सर्व आठ जिल्ह्यांना हवामान विभागाने रविवारसाठी येलो अलर्ट जाहीर केला आहे.

छत्रपती संभाजी नगरमध्ये साधारणपणे ढगाळ आकाश राहणार आहे. तसेच वादळी वारा आणि विजांच्या कडकडाटासह जोरदार पावसाची शक्यता आहे. तर संभाजीनगरमध्ये कमाल तापमान 33 अंश सेल्सियस तर किमान तापमान 25 अंश सेल्सिअस एवढे राहील.

छत्रपती संभाजीनगर बरोबरच जालना, बीड, परभणी मध्येही 40 ते 50 किमी वेगाने वारे वाहणार आहेत. तसेच विजांसह जोरदार पावसाची शक्यता हवामान विभागाने वर्तवली आहे आहे. लातूर, नांदेड, धाराशिव आणि हिंगोली या जिल्ह्यांमध्ये आज 30 ते 40 किमी वेगाने वारे वाहणार असून तुरळक ठिकाणी मध्यम ते जोरदार पावसाची शक्यता आहे.

मराठवाड्यात 15 जून नंतर मात्र पावसाचा जोर कमी होण्याची शक्यता आहे. यानंतर हवामान विभागाने कोणत्याही जिल्ह्याला कोणताही अलर्ट दिलेला नाही. परंतु तरीदेखील 15 जून नंतरही मराठवाड्यात तुरळक ठिकाणी हलक्या पावसाची शक्यता आहे.

दरम्यान, जालना शहरात शनिवारी दुपारी 3 ते 5 वाजेच्या दरम्यान जोरदार पावसाने हजेरी लावली. यामुळे शहरातील अनेक मुख्य रस्त्यावर पाणी साचले होते. बरोबर वाहतुकीला देखील अडथळा निर्माण झाल्याचे पाहायला मिळालं. त्यामुळे नागरिकांना योग्य ती काळजी घ्यावी लागेल.