Weather Alert: वारे वाहणार, विजा कडाडणार, मराठवाड्यातील 6 जिल्ह्यांना पावसाचा अलर्ट

मागील काही दिवसांमध्ये संपूर्ण महाराष्ट्रभर पावसाने विश्रांती घेतली होती. मात्र पुन्हा एकदा पाऊस सक्रीय झाला असून गुरुवारी काही ठिकाणी पावसाने जोरदार हजेरी लावली. आज 12 सप्टेंबर रोजी मराठवाड्यातील काही भागात जोरदार पावसाची शक्यता आहे. पुढील 24 तासांचा हवामान अंदाज जाणून घेऊ.

मराठवाड्यातील जालना आणि छत्रपती संभाजी नगर हे दोन जिल्हे वगळता उर्वरित सहा जिल्ह्यांमध्ये आज जोरदार पावसाची शक्यता आहे. हवामान विभागाने पुढील 24 तासांसाठी यलो अलर्ट जारी केला आहे. हिंगोली, बीड, लातूर, नांदेड, परभणी आणि धाराशिव या जिल्ह्यांत पावसाचा जोर राहणार असून सोसाट्याचा वारा आणि विजांचा कडकडाट होईल.

छत्रपती संभाजीनगर जिल्ह्यात 12 सप्टेंबर रोजी साधारणपणे 15 ते 35 मिमी पाऊस पडण्याचा अंदाज आहे. बीड, लातूर आणि नांदेड जिल्ह्यांमध्ये 10 ते 30 मिमी पावसाची शक्यता असून परभणी व धाराशिव मध्येही याच प्रमाणात पावसाचा अंदाज आहे. हवामान विभागाने दिलेल्या माहितीनुसार पावसामुळे हवामानात काही प्रमाणात गारवा जाणवेल.

मागील काही दिवसांपासून हवामानात सातत्याने बदल दिसून येत आहेत. यामध्ये संपूर्ण मराठवाड्यातील हवामानाचे स्वरूप बदलत असून आर्द्रतेचे प्रमाण वाढण्याचे संकेत आहेत. त्यामुळे काही भागांमध्ये पावसाचा जोर वाढण्याची शक्यता आहे.

दरम्यान, येत्या काळात मराठवाड्यात वेगवान वारे आणि विजांसह पावसाचा जोर राहील. त्यामुळे शेतीपिकांना फटका बसू शकतो. या पार्श्वभूमीवर शेतकऱ्यांना योग्य ती काळजी घ्यावी लागेल. तसेच नागरिकांना देखील सतत बदलणाऱ्या हवामानामुळे आरोग्य जपावं लागेल.