Weather Alert: 24 तासांत हवा बदलणार, मराठवाड्यातील 2 जिल्ह्यांना पुन्हा अलर्ट, पाहा हवामान अंदाज

गेल्या काही दिवसांत राज्यात मुसळधार पाऊस झाला. आता मात्र कोकण, पश्चिम महाराष्ट्र आणि मराठवाड्यातील हवामानात मोठे बदल जाणवत आहेत. मराठवाड्यात पावसाने उघडीप दिली असून काही ठिकाणी हलक्या सरींची शक्यता आहे. छत्रपती संभाजीनगरसह 8 जिल्ह्यांतील हवामान अंदाज जाणून घेऊ.

मराठवाड्यात आज 23 ऑगस्ट रोजी छत्रपती संभाजीनगर, जालना, परभणी, बीड, हिंगोली, नांदेड, या सहा जिल्ह्यात हलका पाऊस होण्याची शक्यता आहे. तसेच ढगांचा गडगडाट देखील होऊ शकतो. तर उर्वरित नांदेड आणि धाराशिव या दोन जिल्ह्यात हलक्या स्वरूपाचा पावसाची शक्यता वर्तवली आहे.

मराठाड्यातील आठ जिल्ह्यांपैकी कुठल्याही जिल्ह्याला हवामान विभागाने आज सतर्कतेचा इशारा दिलेला नाही. त्यामुळे नागरिकांना दिलासा मिळणार आहे. मात्र, काही ठिकाणी ढगांच्या गडगडाटात हलक्या पावसाची शक्यता वर्तवण्यात आली आहे.

गेल्या काही काळात झालेल्या अतिवृष्टी सदृश्य पावसामुळे शेतकऱ्यांचे मोठे नुकसान झाले आहे. सोयगाव तालुक्यात उभी पिके पावसाने वाहून गेली आहेत. तर फुलंब्रीच्या शेवता खुर्द आणि शेवता बुद्रुक गावांच्या मधून जाणऱ्या गिरिजा नदीला पूर आल्याने रस्ता बंद झाला आहे.

दरम्यान, मराठवाड्यात पुढील काही दिवस हवामानाची हीच स्थिती कायम राहणार आहे. रविवारी 24 ऑगस्ट रोजी छत्रपती संभाजीनगर आणि जालन्यात पावसाचा जोर वाढण्याची शक्यता आहे. तर 25 ऑगस्टला नांदेड आणि हिंगोलीत पावसाचा अंदाज आहे.