Weather Alert: मराठवाड्यावर पुन्हा संकट, ताशी 40 किमीने वारे वाहणार, विजा कडाडणार, 6 जिल्ह्यांना अलर्ट

राज्यात पावसाचा जोर वाढला असून काही भागात मुसळधार पाऊस सुरू आहे. मराठवाड्यात जवळपास 20 दिवसांपूर्वी जोरदार पाऊस झाला होता, त्यानंतर पावसाने उघडीत दिली होती. आता मात्र हवामानात काही बदल जाणवत असल्याने पुन्हा जोरदार पावसाची शक्यता आहे. पुढील 24 तासांचा हवामान अंदाज जाणून घेऊ.

मराठवाड्यात पावसाचा जोर वाढणार असल्याचा अंदाज वर्तवण्यात आला आहे. हवामानात बदल झाल्याने काही ठिकाणी थंड तर काही दमट वातावरण निर्माण झाले आहे. आज 28 ऑगस्ट रोजी मराठवाड्यातील 6 जिल्ह्यांना सतर्कतेचा 'येलो अलर्ट' हवामान विभागाने जारी केला आहे. तर उर्वरित 2 जिल्ह्यांत सामान्यतः ढगाळ वातावरण राहणार असून हलक्या ते मध्यम पावसाची शक्यता आहे.

छत्रपती संभाजीनगरसह, जालना, परभणी, बीड, हिंगोली आणि नांदेड या जिल्ह्यांना सतर्कतेचा 'यलो अलर्ट' जारी करण्यात आला आहे. या काळात येथे विजांच्या कडकडाटासह हलका ते मध्यम तर काही ठिकाणी जोरदार पाऊस होण्याची शक्यता आहे. तसेच 30-40 किमी ताशी वेगाने जोरदार वारे वाहू शकतात. तर लातूर आणि धाराशिव या जिल्ह्यात सामान्यतः हलका ते मध्यम स्वरूपाचा पाऊस पडण्याची शक्यता आहे.

छत्रपती संभाजीनगर जिल्ह्यातील 114 मध्यम व लघुप्रकल्पांत 60.84 टक्के पाणीसाठा आहे. या प्रकल्पांची क्षमता 4.60.326 दलघमी असून 247.399 दलघमी उपयुक्त साठा आहे. गेल्या वर्षी याच वेळी या प्रकल्पांत अवघा 28 टक्के साठा होता. 3 मध्यम व 16 लघु, असे 19 प्रकल्प ओव्हर फ्लो झाले आहेत. बोरदहेगाव मध्यम प्रकल्प कोरडाठाक असून वाकोद प्रकल्पात अवघा 5 टक्के साठा आहे.

मराठवाड्यातील 6 जिल्ह्यांना 'यलो अलर्ट' असल्यामुळे होणाऱ्या विजांच्या कडकडाट जनावरांच्या जीवाला धोकादायक ठरू शकतात. त्यामुळे त्यांना सुरक्षित स्थळी ठेवणे, तसेच शेतात एकटे काम न करणे, आणि नागरिकांनी देखील अनावश्यक बाहेर पडणे टाळावे, अशा सूचना शेतकऱ्यांसाठी हवामान विभागाकडून देण्यात आल्या आहे.