Weather Alert: 24 तास पावसाचे, मराठवाड्यात पुन्हा मुसळधार, छ. संभाजीनगरसह 6 जिल्ह्यांना अलर्ट

राज्यात पावसाचा जोर पुन्हा वाढला आहे. कोकण, मध्य महाराष्ट्र, विदर्भ, आणि मराठवाड्यात देखील वादळी वारा आणि विजांच्या कडकडाटात पाऊस सुरू आहे. मराठवाड्यात पावसाची तीव्रता वाढली असून आज पुन्हा 6 जिल्ह्यांना यलो अलर्ट जारी करण्यात आला आहे. पुढील 24 तासांचा हवामान अंदाज जाणून घेऊ.

मराठवाड्यात पुढील 24 तासांसाठी जोरदार पावसाचा इशारा देण्यात आला आहे. आज 29 ऑगस्ट रोजी छत्रपती संभाजीनगरसह 6 जिल्ह्यांना 'यलो अलर्ट' जारी केला आहे. तर उर्वरित 2 जिल्ह्यांत काही ठिकाणी सूर्यप्रकाश तर काही ठिकाणी ढगाळ वातावरण राहणार असून हलक्या ते मध्यम सरी बरसण्याची शक्यता आहे.

शुक्रवारी छत्रपती संभाजीनगरसह, जालना, परभणी, बीड, हिंगोली आणि नांदेड या जिल्ह्यांत जोरदार पावसाचा अंदाज आहे. याभागात विजांच्या कडकडाटासह आणि वादळी वाऱ्यासह जोरदार पावसाची शक्यता वर्तवण्यात आली असून काही ठिकाणी हलका ते मध्यम पाऊस होऊ शकतो. तसेच याकाळात 30-40 किमी प्रतितास वेगाने वारे वाहू शकतात.

लातूर आणि धाराशिव या दोन जिल्ह्यांना सतर्कतेचा कुठलाही इशारा नसून येथे अंशत: ढगाळ वातावरण राहणार आहे. त्यामुळे दोन्ही जिल्ह्यांत थंड आणि दमट वातावरणाचा चढ - उतार पाहायला मिळणार आहे. तसेच काही ठिकाणी हलक्या ते मध्यम सरी बरसण्याची शक्यता आहे.

छत्रपती संभाजीनगरमध्ये गुरुवारी पूर्ण दिवस ढगाळ वातावरण होते. तसेच वातावरणात गारवा देखील मोठ्या प्रमाणात जाणवत होती. सकाळच्या वेळेला रिमझिम पाऊस झाला आणि दुपारनंतर जोरदार पावसाने हजेरी लावली. जोरदार पावसाची स्थिती पुढील 24 तास राहणार असल्याची शक्यता आहे. 48 तासानंतर पावसाचा जोर कमी होणार असल्याचे संकेत हवामान विभागाने दिले आहेत.