Rain Alert: मराठवाड्यात वादळी वारे वाहणार, संभाजीनगरला ऑरेंज अलर्ट, 24 तास धोक्याचे!

गेल्या काही दिवसांपासून राज्यात वादळी पावसाने जोरदार हजेरी लावलीये. मराठवाड्यात देखील पावसाचा जोर कायम आहे. पुढील 24 तासांसाठी मराठवाड्यातील सर्व जिल्ह्यात विजांच्या कडकडाटासह वादळी पावसाचा इशारा देण्यात आला असून यलो अलर्ट जारी केला आहे.

छत्रपती संभाजीनगरमध्ये आज पुन्हा वादळी पावसाची शक्यता आहे. या ठिकाणी आज ऑरेंज अलर्ट देण्यात आलेला आहे. तर जालना, बीड, धाराशिव, परभणी या जिल्ह्यांना यलो अलर्ट देण्यात आला आहे. या ठिकाणी 40 ते 50 किलोमीटर प्रतितास या वेगाने वारे राहतील.

परभणी शहरांमध्ये गुरुवारी रात्री जोरदार पावसाने हजेरी लावलेली आहे. शहरात आज देखील पावसाची शक्यता आहे. तसेच हिंगोली आणि नांदेडमध्येही विजांच्या कडकडाटात वादळी पावसाचा अंदाज वर्तवण्यात आला आहे. या ठिकाणी देखील मध्यम ते हलका स्वरूपाचा पाऊस होईल.

मराठवाड्यात वादळी पावसाने मोठ्या प्रमाणात नुकसान झाले आहे. अनेक ठिकाणी वीज पुरवठा खंडित झाला आहे. तसेच शेतीपिकांचे देखील नुकसान झाले आहे. तर विजा पडल्याने मृतांची संख्याही वाढली असून पुढील काही काळ धोका कायम असल्याने नागरिकांना योग्य ती काळजी घ्यावी लागेल.

दरम्यान, मराठवाड्यात मान्सूनपूर्व पावसाचा जोर कायम आहे. पुढील 2 दिवस हवामानाची हीच स्थिती कायम राहणार असून त्यानंतर मात्र काही प्रमाणात हवापालट होणार असल्याचा अंदाज हवामान विभागाने वर्तवला आहे. त्यामुळे शेतकरी आणि नागरिकांनी योग्य ती काळजी घेणे गरजेचे आहे.