Rain Alert: मराठवाड्यात हवापालट, छ. संभाजीनगरसह 8 जिल्ह्यांत काय स्थिती? आजचा हवामान अंदाज

मे महिन्यात पावसाने राज्यात धुमाकूळ घातला. मात्र मान्सूनचा जोर कमी झाल्याने पाऊस ओसरण्याचे संकेत देण्यात आले आहेत. गेल्या दोन दिवसांपासून पावसाने मराठवाड्यात विश्रांती घेतली आहे. आज 1 जून रोजी देखील मराठवाड्यात तुरळक ठिकाणी रिमझिम पावसाचा अंदाज हवामान विभागाकडून वर्तवण्यात आला आहे.

मराठवाडातील सर्वच जिल्ह्यांत आज तुरळक पावसाची शक्यता हवामान विभागाने वर्तवली आहे. मात्र, कोणत्याही जिल्ह्याला जोरदार पावसाचा इशारा देण्यात आलेला नाही. एक दोन ठिकाणी हलका पाऊस होईल, अशी शक्यता वर्तवण्यात आलीये.

मागील काही दिवसांपासून अंशतः घटलेले छत्रपती संभाजीनगरचे कमाल तापमान पुन्हा 34 अंश सेल्सिअस इतके असेल. तापमान वाढल्यामुळे नागरिकांना उकाडा जाणवणार आहे. पुढील 24 तासात संभाजीनगरमध्ये आकाश ढगाळ राहून हलक्या पावसाची शक्यता आहे. जून महिन्यामध्ये पावसाचा जोर परत वाढणार आहे. त्यामुळे नागरिकांनी योग्य ती खबरदारी घ्यावी.

मराठवाड्यातील जालना, लातूर आणि बीड या जिल्ह्यांत 2 दिवसांपासून पावसाने विश्रांती घेतली आहे. या तिन्ही जिल्ह्यांमध्ये अंशतः ढगाळ वातावरण राहील. तर आज हलक्या पावसाची शक्यता वर्तवण्यात आलीये. मराठवाड्यात जूनच्या पहिल्या आठवड्याच्या शेवटी पुन्हा पावसाचा जोर वाढण्याची शक्यता आहे. नांदेड, हिंगोली आणि धाराशिव या जिल्ह्यांमध्ये देखील पावसाने विश्रांती घेतल्यामुळे तापमान वाढ झालेली आहे.

मे महिन्यात झालेल्या पावसामुळे शेतकऱ्यांचे मोठ्या प्रमाणात नुकसान झालेले आहे. तरी आता सर्व शेतकऱ्यांनी आपल्या शेतातील सर्व मालाची योग्य ती काळजी घ्यावी. पेरणी करण्याची घाई करू नये, असं कृषी तज्ज्ञांनी सांगितलं आहे.