Marathwada Weather: मराठवाड्यात हवापालट, मुसळधार पाऊस कोसळणार, 4 जिल्ह्यांना यलो अलर्ट

राज्यात सध्या पावसाची तीव्रता कमी होत चालली आहे. मराठवाड्यात देखील काही दिवस पावसाने उघडीप दिली होती. आता मात्र हवामानात काही बदल जाणवत आहे. अनेक ठिकाणी ढग विरळ होत असून उन्हाची चाहूल लागतेय, तर काही ठिकाणी रिमझिम सरीही पडत आहे. 25 ऑगस्ट रोजी छत्रपती संभाजीनगरसह 8 जिल्ह्यांचा हवामान अंदाज जाणून घेऊ.

मराठवाड्यात पुन्हा एकदा पावसाचे आगमन होणार असल्याचा इशारा हवामान विभागाने दिला आहे. आज मराठवाड्यातील 4 जिल्ह्यांसाठी जोरदार पावसाचा येलो अलर्ट हवामान विभागाने जारी केला आहे. तसेच नागरिकांना देखील सतर्कतेचा इशारा दिला आहे. जोरदार पावसासह वाऱ्याचा वेग वाढण्याची शक्यता व्यक्त करण्यात आली आहे.

हवामान विभागाने अलर्ट दिलेल्या मराठवाड्यातील 4 जिल्ह्यांमध्ये आज दुपारनंतर आणि संध्याकाळच्या सुमारास मुसळधार पावसाच्या सरी कोसळण्याची शक्यता वर्तवली आहे. या काळात काही भागांत ढगांचा गडगडाट आणि विजांचा कडकडाट होण्याचीही शक्यता आहे.

छत्रपती संभाजीनगरसह, जालना जिल्ह्यात हलका ते मध्यम पाऊस पडण्याची शक्यता असून ढगांचा गडगडाट देखील होऊ शकतो. बीडमध्ये आणि धाराशिव जिल्ह्यात हलका पाऊस आणि काही ठिकाणी ढगांचा गडगडाट होण्याची शक्यता हवामान विभागाने वर्तवली आहे. तर उर्वरित परभणी, हिंगोली, नांदेड आणि लातूर या चार जिल्ह्यांना जोरदार पावसाचा यलो अलर्ट जारी करण्यात आला असून याकाळात हलका ते मध्यम स्वरूपाचा पाऊस तसेच काही ठिकाणी जोरदार पाऊस आणि सोसाट्याच्या वाऱ्यासह विजांचा कडकडाट होऊ शकतो. तसेच ताशी 30 ते 40 किमी वेगाने वारे वाहतील.

परभणी, हिंगोली, नांदेड आणि लातूर या 4 जिल्ह्यांना यलो अलर्ट हवामान विभागाने जारी केला असल्यामुळे या ठिकाणी जोरदार पाऊस पडण्याची शक्यता आहे. तसेच यावेळी होणाऱ्या विजांच्या कडकडाटामुळे जनावरांना सुरक्षित स्थळी ठेवणे आणि शेतात एकटे काम न करणे, तर नागरिकांनी देखील अनावश्यक बाहेर पडणे टाळावे, असा सल्ला 8 ही जिल्ह्यातील शेतकऱ्यांसाठी हवामान विभागाकडून देण्यात आला आहे.