Siddharth udyan : पर्यटकांसाठी पर्वणी, सिद्धार्थ उद्यानात आले नवे पाहुणे, पाहा खास PHOTOS

छत्रपती संभाजीनगरमधील सिद्धार्थ उद्यान हे पर्यटकांचं आणि लहान मुलांचं आकर्षणाचं केंद्र आहे. केंद्रीय प्राणीसंग्रहालय प्राधिकरणाच्या मंजुरीनुसार कर्नाटकातील शिवमोगा येथून 2 सिंह, 2 अस्वल आणि 2 कोल्हे सिद्धार्थ उद्यानात आणण्यात आले. त्याच्या मोबदल्यात येथून 01 पांढरे नर वाघ आणि 2 पिवळ्या वाघीण शिवमोगा प्राणीसंग्रहालयाकडे पाठविण्यात येणार आहेत.

दिनांक 25 सप्टेंबर रोजी रात्री 8 वाजता शिवमोगा येथून प्राण्यांची जोडी वनपरिक्षेत्र अधिकारी नागेश बलेगर आणि पशुवैद्यक डॉ. मुरली मनोहर यांच्या देखरेखीखाली रवाना झाली होती. तब्बल दोन दिवसांच्या प्रवासानंतर आज 27 सप्टेंबर रोजी सकाळी 8 वाजता हे प्राणी सुरक्षितपणे सिद्धार्थ उद्यानात दाखल झाले.

‎प्राणी सिद्धार्थ उद्यानात सुरक्षितरीत्या उतरविण्यात आले आणि त्यांच्या निवासासाठी विशेष व्यवस्था करण्यात आली आहे. सध्या त्यांना नियमित खाऊ-पाणी दिले जात असून सर्वांची आरोग्य तपासणीही पूर्ण झाली आहे.

अस्वलांच्या पिंजऱ्यात झोका आणि खेळणी उपलब्ध करून देण्यात आली आहे. त्यांची 24 तास देखरेख करण्यासाठी कर्मचारी नियुक्त केले आहेत.

स्थानिक वातावरणाशी जुळवून घेण्यासाठी पुढील 2 ते 3 दिवस प्रेक्षकांना हे प्राणी पाहता येणार नाहीत. त्यानंतरच नागरिकांना सिंह, अस्वल आणि कोल्ह्यांचे दर्शन घेण्याची संधी मिळणार आहे.