संध्याकाळी घराला कुलूप लावून बाहेर गेले; रात्री घरी परतताच दिसलं असं काही, पुरतं हादरलं पुण्यातील कुटुंब

फरासखाना पोलिसांनी दिलेल्या माहितीनुसार, तक्रारदार तरुण आपल्या कुटुंबीयांसह कसबा पेठेतील पवळे चौक परिसरातील एका सोसायटीत राहतात. ६ मार्च रोजी सायंकाळी हे कुटुंब कामानिमित्त फ्लॅटला कुलूप लावून बाहेर गेले होते. याच संधीचा फायदा घेत चोरट्यांनी त्यांच्या फ्लॅटचे मुख्य कुलूप तोडून आत प्रवेश केला. खोलीतील कपाटात ठेवलेले सोन्याचे दागिने चोरून चोरटे फरार झाले. रात्री अकराच्या सुमारास जेव्हा तक्रारदार घरी परतले, तेव्हा त्यांना धक्काच बसला. घराचा दरवाजा उघडा आणि कपाटातील सामान अस्ताव्यस्त दिसले. चोरी झाल्याचे लक्षात येताच त्यांनी तातडीने फरासखाना पोलीस ठाण्यात धाव घेतली.

घटनेची माहिती मिळताच फरासखाना पोलिसांचे पथक तातडीने घटनास्थळी दाखल झाले आणि त्यांनी परिसरातील पाहणी केली. चोरट्यांनी रेकी करून ही चोरी केली असावी, असा पोलिसांचा संशय आहे. सीसीटीव्ही फुटेजच्या मदतीने चोरट्यांचा शोध घेण्याचे काम सुरू आहे. भरवस्तीत आणि सोसायट्यांच्या सुरक्षिततेला छेद देत झालेल्या या चोरीमुळे पुणेकर आता धास्तावले आहेत. पोलिसांनी परिसरातील सीसीटीव्ही कॅमेरे तपासण्यास सुरुवात केली असून, लवकरच आरोपींना जेरबंद केले जाईल, अशी माहिती दिली आहे.