नाद करा पण सातारकरांचा कुठं! 15 मिनिटात पेपर, घाटात वाहतूक ठप्प; पॅराग्लायडिंग पठ्ठ्यानं गाठलं कॉलेज

सोशल मीडियावर व्हायरल झालेल्या एका व्हिडिओमध्ये पाचगणी-महाबळेश्वरला जोडणाऱ्या मार्गावरील पसारणी घाट विभागातील हॅरिसन फॉली पॉइंटवरून एका विद्यार्थ्याला परीक्षा केंद्रावर जाण्यासाठी पॅराग्लायडिंगचा पर्याय निवडावा लागलाय.

पाचगणी-महाबळेश्वर घाटावरील वाहतूक कोंडीची समस्या पुन्हा एकदा समोर आली आहे, विशेषतः आठवड्याच्या शेवटी आणि वर्षाच्या शेवटी या भागात होणाऱ्या ट्रॉफीकमुळे एका विद्यार्थ्याला अडचणीचा सामना करावा लागला.

पसरणी गावचा समर्थ महांगडे वाईतील किसन वीर महाविद्यालयात आहे. 15 फेब्रुवारीला पेपर होता. मात्र, त्या दिवशी तो कामानिमित्त पाचगणीला गेला. त्यावेळी एका विद्यार्थीनीने त्याला पेपर असल्याची आठवण करून दिली.

पेपरला 15 मिनिट शिल्लक असताना घाटात लांबच्या लांब ट्राफिक होतं. त्यामुळं अर्ध्या तासात परीक्षा केंद्रावर पोहोचणं शक्य नव्हतं. गोविंद येवले यांनी त्याला पॅराग्लायडिंगद्वारे परीक्षा केंद्रावर पोहोचवण्याची तयारी दाखवली.

प्रशिक्षित गोविंद येवले यांनी पॅराग्लायडर्ससोबत समर्थला कॉलेजच्या परिसरातील मैदानावर उतरवलं. तिथं मित्र त्याची बॅग घेऊन पोहोचला होता. पेपरला पाच मिनिटं शिल्लक असताना समर्थला वेळेवर पोहोचता आलं.

समर्थ महांगडे हा पॅराग्लायडिंग करत परीक्षेला जात असलेला व्हिडिओ सोशल मीडियावर तुफान व्हायरल होत आहे. नाट्यमयरित्या समर्थला पेपरला पोहोचता आल्याने अनेकांनी आश्चर्य व्यक्त केलं आहे.

दरम्यान, गोविंद येवले यांच्यामुळं मी परीक्षेला वेळेत पोहचू शकलो, असं म्हणत समर्थने गोविंद येवले यांचे आभार मानले. तसेच सोशल मीडियावर देखील या कृतीचं कौतूक केलं जातंय.