Vidarbha Alert: विदर्भात अचानक हवापालट, उष्णतेच्या लाटेसोबत नवं संकट, IMD चा अलर्ट

विदर्भात उन्हाचा कडाका कायम असून काही भागांत ढगाळ वातावरण तयार झाले आहे. हवामान विभागाने वर्तवलेल्या अंदाजानुसार, आज 26 एप्रिलपासून विदर्भातील काही भागांत वादळी वारा आणि विजांच्या कडकडाटासह पावसाची शक्यता आहे. त्यामुळे नागरिकांनी सावध राहण्याचे आवाहन करण्यात आले आहे.

नागपूरमध्ये कमाल तापमान 43 अंश सेल्सिअस असून आकाश ढगाळ राहू शकतं. त्याचबरोबर वादळी वाऱ्यांसह आणि विजांच्या कडकडाटासह पावसाची शक्यता वर्तवण्यात आली आहे. तर अमरावतीत तापमान 44 अंश सेल्सिअस असून दुपारनंतर आकाश ढगाळ राहण्याचा अंदाज आहे. हवामान उष्ण असून दमट वातावरण जाणवण्याची शक्यता आहे.

अकोल्यात तापमान 43 अंश सेल्सिअस आहे. येथे उष्णतेची लाट कायम असून उन्हाचा तीव्र त्रास जाणवण्याची शक्यता आहे. वर्धा येथे तापमान 43 अंश सेल्सिअस असून वादळी वाऱ्यांसह पावसाचा अंदाज आहे.

गोंदियात 42 अंश सेल्सिअस तापमान असून अंशतः ढगाळ वातावरण असू शकतं. बुलढाणा येथे तापमान 41 अंश सेल्सिअस आहे. सकाळपासून आकाश निरभ्र राहून दुपारी किंवा सायंकाळनंतर अंशतः ढगाळ वातावरण निर्माण होण्याची शक्यता आहे.

नागपूर, वर्धा, आणि आसपासच्या भागांमध्ये वादळी वाऱ्यांसह आणि विजांच्या कडकडाटासह पावसाचा इशारा हवामान विभागाने दिला आहे. वादळी वारे आणि अचानक येणारा पाऊस पिकांना हानी पोहोचवू शकतो. आंबा आणि फळझाडांवरील फळ गळण्याचा धोका आहे. पिकांचे नुकसान टाळण्यासाठी शेतकऱ्यांनी योग्य ती प्रतिबंधक उपाययोजना कराव्यात, असे आवाहन करण्यात आले आहे.

उन्हामुळे डोकेदुखी, अशक्तपणा यांसारख्या त्रासांची शक्यता आहे. त्यामुळे शक्यतो घरात राहावे. भर उन्हात बाहेर जाणे टाळावे. पाणी भरपूर प्यावे. विजांच्या शक्यतेमुळे विजेवर चालणारी उपकरणे वापरताना काळजी घ्यावी. हवामान खात्याच्या सूचनांचे पालन करावे, असेही आवाहन आरोग्य विभागाकडून करण्यात आले आहे.

पुढील काही दिवस विदर्भात ढगाळ वातावरण, वादळी वारे आणि हलक्या पावसाच्या सरी बरसण्याची शक्यता आहे. काही ठिकाणी उष्णतेची लाट कायम राहू शकते. हवामानात अचानक बदल होण्याची शक्यता असल्यामुळे नागरिकांनी सतर्कता बाळगणे गरजेचे आहे.