Pune: पुण्याच्या प्रसिद्ध रुग्णालयात सापडल्या दारूच्या बाटल्या, रुग्णांच्या जीवाशी खेळ

गोविंद वाकडे, प्रतिनिधी, पिंपरी-चिंचवड: पिंपरी-चिंचवड महापालिकेचे मुख्य रुग्णालय असलेल्या यशवंतराव चव्हाण स्मृती रुग्णालयात अत्यंत संतापजनक प्रकार समोर आला आहे.

रुग्णांच्या आरोग्याची काळजी घेणाऱ्या या वास्तूत ठिकठिकाणी गुटखा-तंबाखूच्या पिचकाऱ्या आणि चक्क देशी दारूच्या बाटल्या सापडल्याने खळबळ उडाली आहे. या गंभीर प्रकारामुळे रुग्णालयाच्या सुरक्षेवर आणि स्वच्छतेवर प्रश्नचिन्ह उपस्थित केले जात आहे.

गेल्या काही दिवसांपासून रुग्णालयातील वॉर्ड आणि स्वच्छतागृहांमध्ये अस्वच्छता वाढल्याच्या तक्रारी येत होत्या. पाहणी केली असता, रुग्णालयाच्या भिंती आणि शौचालये तंबाखू-पानमसाल्याने माखलेली दिसून आली.

सर्वात धक्कादायक बाब म्हणजे, वॉर्डच्या कोपऱ्यात आणि काही ठिकाणी रिकाम्या दारूच्या बाटल्या आढळून आल्या आहेत. त्यामुळे हे रुग्णालय आहे की मद्यपींचा अड्डाॉ? असा संतप्त सवाल नागरिक विचारत आहेत.

या गैरप्रकारांमुळे सामान्य नागरिक आणि रुग्णांच्या नातेवाईकांमध्ये तीव्र संताप व्यक्त होत आहे. रुग्णालयात अशा वस्तू येतातच कशा, असा प्रश्न उपस्थित करत नागरिकांनी महापालिका प्रशासनाकडे कडक कारवाईची मागणी केली आहे.