कापड दुकान बंद पडलं म्हणून कोंबड्या पाळल्या, आता महिन्याला होतेय लाखोंची कमाई

भारत हा कृषीप्रधान देश आहे. देशाची निम्मी लोकसंख्या ही शेती करते. शेतीला असे पूरक जोडधंदा हे शेतकरी करत असतात. शेतकरी जोडधंद्यामधून मोठ्या प्रमाणामध्ये उत्पन्न देखील काढत असातात. छत्रपती संभाजीनगर जिल्ह्यातील संदीप मतसागर यांनी पोल्ट्री व्यवसाय सुरू करून यातून लाखोंची कमाई ते करत आहेत.

छत्रपती संभाजीनगर जिल्ह्यातील वैजापूर तालुक्यातील जरूळ या छोट्याश्या गावातील संदीप मतसागर हे आहेत. संदीप यांचे आई वडील दोघेही हे शेती काम करतात. संदीप यांनी बारावीपर्यंत शिक्षण घेतलं. पुढं नोकरीची काही शाश्वती नव्हती म्हणून त्यांनी व्यवसाय करायचा ठरवलं.

त्यांनी सुरुवातीला कापड दुकान टाकलं पण या कापड दुकानामध्ये त्यांना पाहिजे तसे यश नाही भेटलं. आणि लॉकडाऊन लागल्यामुळे दुकान त्यांना बंद करावा लागलं. हे दुकान बंद पडल्यामुळे त्यांच्यासमोर प्रश्न पडला की आता आपण कोणता व्यवसाय करायचा.

मित्रांमध्ये त्यांनी चर्चा केली. गावातील लोकांना विचारपूस केली की मी कोणता व्यवसाय सुरू करावा असं त्यानी विचारलं आणि यातून त्यांना कुक्कुट पालनाचा व्यवसाय करावा असं सर्वांनी सांगितलं.

कुक्कुट पालनाचा व्यवसाय करायचा म्हटलं तर तो कसा करावा याविषयी संदीप यांना काहीच माहिती नव्हती. यासाठी त्यांनी सर्व चौकशी केली. इतर पोल्ट्री फार्म बघितले कशे आहेत काय आहेत आणि त्यानंतर त्यांनी निर्णय घेतला की आपण पोल्ट्री फार्म सुरू करावा. मग संदीप यांनी आपल्या शेतामध्ये एसी पोल्ट्री फार्म सुरू करण्याचा निर्णय घेतला.

यासाठी त्यांना त्यांच्या भाऊ आणि वडिलांनी मदत करून हा पोल्ट्री फार्म त्यांना सुरू करून दिला. संदीप यांच्याकडे दोन शेड असलेले फॉर्म आहे. या ठिकाणी 30 ते 32 हजार एवढे पक्षी ठेवण्याची क्षमता आहे. विशेष म्हणजे हे पोल्ट्री फार्म एसी आहे. दोन महिन्यांमध्ये हे पक्षी तयार होतात. आणि नंतर ते कंपनीकडे पाठवून देतात. यातून त्यांना 2 महिन्याकाठी 4 ते 5 लाखाचं उत्पन्न मिळतं.

मी हा व्यवसाय सुरू केला तेव्हा सुरुवातीला मला मोठ्या प्रमाणात नुकसान झालं. पण हळूहळू हळूहळू संपूर्ण या व्यवसायातली मला माहिती झाली आणि आता मी लाखो रुपये उत्पन्न कमवतो. सर्व शेतकऱ्यांनी देखील आपल्या शेतीला असा जोड धंदा केला तर नक्कीच त्यांना फायदा होईल, असं शेतकरी संदीप मतसागर यांनी सांगितलं.