China Gold: चीनने केली मोठी उलथापालथ, जगभरात गोल्ड इमर्जन्सी; भारतासाठी डेंजर सिग्नल, बाजारात येणार ‘शॉकवेव्ह’

चीनने जागतिक सोन्याच्या बाजारात आणखी एक मोठे पाऊल टाकत सलग 13व्या महिन्याही सोने खरेदी करण्याचा आपला आक्रमक सिलसिला कायम ठेवला आहे. चीनच्या सेंट्रल बँकेने (पीपल्स बँक ऑफ चायना) नोव्हेंबर महिन्यात आपल्या गोल्ड रिझर्व्हमध्ये आणखी 30,000 ट्रॉय औंसची भर घातली, ज्यामुळे त्यांचा एकूण साठा वाढून 74.12 दशलक्ष ट्रॉय औंसपर्यंत पोहोचला आहे.

नोव्हेंबर 2024 पासून सुरू झालेला हा खरेदीचा सलग प्रवाह आता जागतिक बाजारातील सर्वात मोठ्या आणि महत्वाच्या गोल्ड मूव्हमेंटपैकी एक मानला जात आहे. कारण सध्या सोन्याच्या किंमती विक्रमी वर्षाकडे वाटचाल करत आहेत आणि त्याच काळात चीनसारखा महाकाय देश सोन्याचा साठा इतक्या आक्रमकपणे वाढवत आहे, ही गोष्ट बाजारातील हालचालींना मोठे वळण देणारी मानली जाते.

भारतामध्ये सोमवारी 8 डिसेंबर 2025 रोजी डिसेंबर गोल्ड फ्यूचर्स किंमतींमध्ये थोडी प्रॉफिट बुकिंग दिसून आली. सोने 0.07% घसरून प्रति 10 ग्रॅम 1,30,365 या पातळीवर व्यवहार करत होते. चांदीच्या दरांमध्ये अधिक घसरण झाली असून सिल्व्हर फ्यूचर्स 1.12% नी स्वस्त होऊन प्रति किलो 1,81,350 वर आली आहे.

आंतरराष्ट्रीय बाजारात 8 डिसेंबरला स्पॉट गोल्ड $4,207 प्रति औंस या स्तरावर दिसले आणि 24 तासांत 0.29% ची सौम्य वाढ नोंदवली. सोने सध्या $4,000 प्रति औंसच्या वर स्थिर आहे आणि ऑक्टोबरमधील शिखर पातळीपेक्षा किंचित खाली येऊनही, 1979 नंतरच्या सर्वात उत्तम वर्षाकडे वाटचाल करत असल्याचे तज्ज्ञ मानतात.

यामागील प्रमुख कारण म्हणजे अमेरिकेच्या फेडरल रिझर्व्हची 9–10 डिसेंबर रोजी होणारी बैठक, ज्यात व्याजदर कपातीची शक्यता बाजारात आणखी जोर धरत आहे. फेडचे पुढील चेअरपर्सन “सौम्य आणि सवलत देणारी” धोरण भूमिका घेऊ शकतात, अशी अपेक्षा असल्यामुळेही सोन्याला मजबूत आधार मिळत आहे.

विश्लेषकांच्या मते या आठवड्यात फेडची धोरण घोषणा, चीन–अमेरिका आर्थिक संकेत आणि रुपयातील हालचाल हे घटक सोन्याच्या किंमतींवर थेट परिणाम करतील. सध्या जागतिक स्तरावर केंद्रीय बँकांची सोने खरेदी, तसेच व्याजदर कपात होण्याच्या वाढत्या शक्यतांमुळे सोन्याचा दीर्घकालीन कल सकारात्मकच राहील, असे त्यांचे मत आहे.

सोन्याच्या किंमती ऐतिहासिक पातळीवर असताना आणि गुंतवणूकदार सुरक्षित मालमत्तेकडे वळत असताना, हा ट्रेंड आणखी बळावण्याची शक्यता वर्तवली जात आहे.