IRCTC वरुन झटपट मिळेल Confirm Ticket! बुकिंग करताना या ट्रिक ठेवा लक्षात

IRCTC Confirm Train Ticket Trick: रेल्वे तिकीट बुकिंगमध्ये थोडासाही उशीर झाला तर कन्फर्म तिकीट मिळणे कठीण होते. बऱ्याचदा लोक तत्काळ तिकिटे बुक करण्याचा प्रयत्न करतात पण जागा लवकर भरल्यामुळे त्यांना ती मिळत नाहीत.

तुम्हालाही अशा त्रासापासून वाचायचे असेल तर आम्ही तुम्हाला एक सोपा मार्ग सांगणार आहोत, ज्याद्वारे तुमचे तिकीट बुकिंग लवकर होईल. यासाठी, तुम्हाला फक्त IRCTC वेबसाइटवरील आवश्यक ऑप्शन वापरावा लागेल आणि काही सोप्या गोष्टी लक्षात ठेवाव्या लागतील.

इंटरनेटचा स्पीड जास्त असावा : तिकिटे बुक करण्यापूर्वी, कृपया तुमचा इंटरनेट स्पीड तपासा. जर इंटरनेट स्लो असेल तर पेज लोड होण्यास वेळ लागेल आणि तुम्ही फॉर्म भरेपर्यंत सर्व तिकिटे बुक केली जातील. म्हणून फास्ट इंटरनेट कनेक्शन वापरा.

तत्काळ तिकीट बुकिंगमध्ये वेळेला सर्वात जास्त महत्त्व असते. AC कोचसाठी तात्काळ तिकिट बुकिंग सकाळी 10 वाजता आणि स्लीपर कोचसाठी सकाळी 11 वाजता सुरू होते. तुम्हाला एसी कोचची तिकिटे बुक करायची असतील तर सकाळी 9:58 पर्यंत आयआरसीटीसीमध्ये लॉग इन करा.

स्लीपर कोच तिकिटांसाठी सकाळी 10:58 पर्यंत लॉगिन करा. तुम्ही आधीच लॉगिन केले नाही तर ओटीपी येण्यास आणि डिटेल्स भरण्यास वेळ लागू शकतो, ज्यामुळे तिकीट हातातून निसटू शकते.

एक मास्टर लिस्ट ठेवा : आपण तिकीट बुक करतो तेव्हा आपल्याला नाव, वय, आधार नंबर, बर्थ प्रिफरेंस इत्यादी प्रवाशांची माहिती भरावी लागते. या संपूर्ण प्रक्रियेला इतका वेळ लागतो की तिकीट बुक होण्यापूर्वीच सर्व जागा भरतात. हे टाळण्यासाठी, आयआरसीटीसी वेबसाइटवर एक मास्टर लिस्ट बनवा. यामुळे तिकीट बुक करताना सर्व माहिती आपोआप भरली जाईल आणि तुमचा वेळ वाचेल.

मास्टर लिस्ट कशी तयार करावी? : IRCTC वेबसाइटवर जा आणि 'My Profile' सेक्शन उघडा. तुम्हाला तिथे 'Master List' हा ऑप्शन दिसेल, त्यावर क्लिक करा. आता प्रवाशाचे नाव, वय, ओळखपत्र माहिती (आधार, पॅन इ.), बर्थ प्रिफरेंस अशी सर्व माहिती भरा.

लिस्ट तयार झाल्यानंतर, तिकीट बुक करताना, फक्त नावावर क्लिक करा आणि सर्व डिटेल्स आपोआप भरले जातील.

लवकर पेमेंट करा : सर्व डिटेल्स आधीच भरलेले असताना, तिकीट बुक करण्यासाठी फक्त पैसे द्यावे लागतील. पेमेंटसाठी UPI, IRCTC वॉलेट किंवा नेट बँकिंग वापरा. तुमच्या बँक अकाउंटमध्ये पुरेसे बॅलेन्स आहे याची खात्री करा जेणेकरून पेमेंट करण्यात कोणतीही अडचण येणार नाही. पेमेंट त्वरित केले जात असल्याने UPI हा सर्वात जलद ऑप्शन आहे.