1 ऑक्टोबर तारीख लक्षात ठेवा! रेल्वे बुकिंग तिकिटाचे बदलणार नियम, तुमच्यावर थेट परिणाम

तुमच्याकडे फक्त 12 तास शिल्लक आहे. 1 ऑक्टोबरपासून तिकिटाचे नियम बदलणार आहेत. भारतीय रेल्वे हे जगातील चौथ्या क्रमांकाचे मोठे रेल्वे नेटवर्क आहे. देशभरात दररोज लाखो प्रवासी रेल्वेने प्रवास करतात. आता लवकरच सणासुदीचा काळ सुरू होत असल्याने गाड्यांमध्ये प्रवाशांची गर्दी वाढणार आहे. याच पार्श्वभूमीवर, रेल्वेने तिकीट बुकिंगच्या नियमांमध्ये महत्त्वपूर्ण बदल केला आहे, जो १ ऑक्टोबर २०२५ पासून लागू होणार आहे.

हा नवा नियम विशेषतः सामान्य आरक्षणाचे तिकीट बुक करणाऱ्या प्रवाशांसाठी अत्यंत महत्त्वाचा आहे. रेल्वेच्या नवीन नियमानुसार, सामान्य आरक्षणासाठी आता आधार कार्ड व्हेरिफिकेशन असणं आवश्यक आहे. तिकीट बुकिंग सुरू झाल्यानंतरचे पहिल्या 15 मिनिटांत त्याच लोकांना बुकिंग करता येणार आहे.

जर आधार कार्ड व्हेरिफिकेशन केलं नसेल तर तिकीट बुकिंग करण्यात अडचणी येतील. त्यामुळे आताच आधार कार्ड व्हेरिफिकेशन पूर्ण करून घ्या. नाहीतर बुकिंग करण्यात अडचणी येतील. आत्तापर्यंत हा नियम केवळ तत्काळ तिकीट बुकिंगसाठी लागू होता. मात्र तो जनरल तिकिटासाठी देखील लागू होणार आहे.

१ ऑक्टोबर २०२५ पासून जनरल रिझर्व्हेशनसाठी सुद्धा हा नियम अनिवार्य करण्यात आला आहे. सामान्य आरक्षणाची बुकिंग सुरू झाल्यावर पहिले १५ मिनिटे केवळ आधार व्हेरिफाइड युजर्सच IRCTC च्या वेबसाइट किंवा ॲपवरून तिकीट बुक करू शकतील.

तिकीट बुकिंगमध्ये होणारी गैरव्यवहार आणि दलाली रोखण्यासाठी रेल्वेने हा निर्णय घेतला आहे. सणासुदीच्या काळात तिकीट दलाल अनेकदा बनावट किंवा खोट्या आधार कार्डांचा वापर करून मोठ्या प्रमाणात आरक्षण करतात आणि नंतर तीच तिकिटे प्रवाशांना अधिक किमतीत विकतात.

रेल्वे बोर्डाने या संदर्भात नुकताच सूचनापत्र जारी केलं. सामान्य आरक्षणाचा फायदा सामान्य प्रवाशांना मिळावा आणि दलालांकडून त्याचा गैरवापर होऊ नये, यासाठी हा निर्णय घेण्यात आल्याचे रेल्वे बोर्डाने स्पष्ट केले आहे.

हा नवीन नियम केवळ IRCTC च्या वेबसाइट आणि ॲपवर लागू होईल, म्हणजेच ऑनलाइन तिकीट बुकिंगवर. भारतीय रेल्वेने Passenger Reservation System काउंटरवर तिकीट बुकिंगच्या नियमांमध्ये कोणताही बदल केलेला नाही.

PRS काउंटरवर तिकीट बुकिंग पूर्वीप्रमाणेच सुरू राहील. याचा अर्थ, ज्या प्रवाशांनी आधार कार्डाचे व्हेरिफिकेशन केलेले नाही, ते प्रवासी रेल्वे स्टेशनवरील काउंटरवर जाऊन तिकीट बुक करू शकतील. रेल्वे प्रवाशांनी IRCTC वेबसाइटवर आपले आधार कार्ड त्वरित प्रमाणित करून घ्यावे, जेणेकरून सणासुदीच्या काळात ऑनलाइन तिकीट बुकिंग करताना गैरसोय होणार नाही.