Success Story : वय फक्त 18 वर्षे, ऋषिकेश करतोय महिन्याला 4 लाखाची उलाढाल, असं काय केलं?

शिक्षणात काही मन लागत नाही, याकरता आपण स्वतःचाच व्यवसाय करू या विचाराने नाशिकमधील ऋषिकेश बोधक या 18 वर्षाच्या तरुणाने स्वतःचे मटण भाकरी सेंटर उभारले असून, दर महिन्याला 3 ते 4 लाखाची उलाढाल सुद्धा हा तरुण उद्योजक करत आहे. जे वय फिरण्या - बागडण्याचे आहे, त्या वयातच स्वतःचे काहीतरी अस्तित्व निर्माण करण्याची इच्छा या तरुणाच्या अंगी असल्याने आज हा तरुण त्याचा व्यवसाय सांभाळत असतो.

घराची परिस्थिती हलाखीची असल्याने ऋषिकेश हा त्याच्या वडिलांसोबत इतरांच्या हॉटेलमध्ये कामाला जात असे. परंतु काही काळानंतर ऋषिकेश याच्या वडिलांनी स्वतःच्या हिमतीवर छोटे नाश्ता सेंटर सुरू केले. त्यानंतर ऋषिकेश हा त्यांच्या दुकानाला सांभाळू लागला. शिक्षणात काही गोडी नसल्याने आपण आपलाच व्यवसाय वाढवू या विचाराने दिवस-रात्र हा तरुण काम करत असे.

हा तरुण 18 वर्षाचा असून आज नाशिकमध्ये आई-वडिलांच्या साथीमुळे आणि स्वतःच्या जिद्दीमुळे तब्बल स्वतःचे 4 दुकान सांभाळत असतो. एक वेळ इतरांच्या हाताखाली काम करणारा ऋषिकेश महिन्याला 3 ते 4 लाख रुपयांची उलाढाल सुद्धा करत असतो. तर इतकेच नाही, आज हा तरुण इतर 10 लोकांचे देखील घर चालवायला मदत करत असतो.

कोरोनाकाळात हॉटेल बंद करण्याची वेळ असली असताना देखील हार न मानता आई-वडिलांसोबत जिद्दीने लढत आलेल्या या तरुणाचे आज स्वप्न देखील पूर्ण होताना दिसत आहे.

ज्या वयात तरुण मुले मौजमजा करतात, फिरतात, हिंडतात, त्या वयात हा तरुण स्वतःचे साम्राज्य निर्माण करण्याच्या मागे लागला असून, हा तरुण या तरुण पिढीसमोर एक आदर्श सुद्धा निर्माण करत आहे.