Currency : 500 रुपयांची नोट खिशात असणाऱ्यांसाठी अलर्ट; मार्च 2026 च्या डेडलाईनवर केंद्र सरकारचं वक्तव्य

आता पैशांचा व्यवहार ऑनलाइन झाला आहे, त्यामुळे आता लोक स्वत:कडे कॅश ठेवत नाहीत, पण असं असलं तरी देखील अनेकांच्या पाकिटात 500 रुपयांच्या नोटा मिळतातच. कारण काही व्यवहारांमध्ये कॅश ही गरजेची असते. सध्या इंटरनेटवर एक बातमी वाऱ्यासारखी पसरतेय, ज्यामुळे सर्वसामान्यांमध्ये चिंतेचं वातावरण आहे. पण घाबरून जाण्यापूर्वी ही माहिती नीट वाचा.

सकाळची चहाची टपरी असो किंवा मोठं शॉपिंग मॉल, 500 रुपयांची नोट आपल्या दैनंदिन व्यवहाराचा भाग आहे. 2016 च्या नोटाबंदीनंतर 500 रुपयांची नवी नोट चलनात आली आणि ती आता आपल्या आयुष्याचा अविभाज्य भाग बनली आहे. पण गेल्या काही दिवसांपासून व्हॉट्सॲप आणि सोशल मीडियावर एक मेसेज वेगाने व्हायरल होत आहे. या मेसेजमध्ये असा दावा केला जात आहे की, "मार्च 2026 पर्यंत एटीएममधून 500 रुपयांच्या नोटा मिळणं बंद होतील आणि या नोटा चलनातून बाद केल्या जातील."

या एका मेसेजमुळे सर्वसामान्य नागरिकांमध्ये पुन्हा एकदा 2016 सारखी परिस्थिती निर्माण होईल की काय, अशी भीती दाटली आहे. मात्र, या दाव्यांमध्ये किती तथ्य आहे? चला तर मग, केंद्र सरकार आणि आरबीआयने (RBI) दिलेला अधिकृत खुलासा जाणून घेऊया.

पीआयबी फॅक्ट चेक (PIB Fact Check) आणि भारतीय रिझर्व्ह बँकेने या प्रकरणाची गंभीर दखल घेतली आहे. सरकारकडून अधिकृतपणे स्पष्ट करण्यात आले आहे की, 500 रुपयांच्या नोटा बंद होण्याबाबतचा कोणताही निर्णय घेण्यात आलेला नाही. सोशल मीडियावरील हे दावे पूर्णपणे 'फर्जी' (Fake) असून लोकांनी यावर विश्वास ठेवू नये, असे आवाहन करण्यात आले आहे.

आरबीआयने 'X' (ट्विटर) वर माहिती देताना स्पष्ट केले की, नोटाबंदी किंवा नोटांच्या वितरणाबाबत अशा प्रकारची कोणतीही घोषणा करण्यात आलेली नाही. 500 रुपयांच्या नोटा पूर्णपणे वैध राहतील आणि लोक त्यांचा वापर पूर्वीप्रमाणेच करू शकतात.

केवळ सोशल मीडियाच नाही, तर संसदेतही या विषयावर चर्चा झाली. केंद्रीय वित्त राज्यमंत्री पंकज चौधरी यांनी स्पष्ट केले की, सरकारची 500 रुपयांच्या नोटांचा पुरवठा थांबवण्याची कोणतीही योजना नाही. 100 आणि 200 रुपयांच्या नोटांसोबतच 500 रुपयांच्या नोटा देखील एटीएममध्ये उपलब्ध राहतील. एटीएम मशिनमधून या नोटा काढल्या जात असल्याचा दावा त्यांनी स्पष्टपणे फेटाळून लावला आहे.

गेल्या वर्षी जूनमध्ये एका यूट्यूब चॅनेलने असाच एक व्हिडिओ प्रसिद्ध केला होता, ज्यातून ही अफवा पसरण्यास सुरुवात झाली. अशा प्रकारच्या बातम्यांचा मुख्य उद्देश लोकांमध्ये संभ्रम निर्माण करणे आणि खळबळ माजवणे हा असतो.

काय काळजी घ्यावी?1. अधिकृत स्त्रोत तपासा: कोणत्याही आर्थिक बदलाबाबतची माहिती आरबीआयच्या अधिकृत वेबसाईटवर (rbi.org.in) प्रसिद्ध केली जाते.2. फॅक्ट चेक करा: पीआयबी फॅक्ट चेकच्या माध्यमातून अशा अफवांची शहानिशा करा.3. अफवा पसरवू नका: खात्री पटल्याशिवाय कोणताही मेसेज इतरांना फॉरवर्ड करू नका, कारण यामुळे समाजात भीतीचे वातावरण निर्माण होऊ शकते.थोडक्यात सांगायचे तर... तुमच्या खिशातील 500 रुपयांची नोट सुरक्षित आहे आणि ती यापुढेही वैध राहणार आहे. मार्च 2026 ची तथाकथित डेडलाईन ही निव्वळ अफवा असून नागरिकांनी निर्धास्त राहावे.